ڕۆژی پێنجشەممە، ١٦ی خاکەلێوە، خاتوو خەدیجە سەیاحی خێزانی شەهید مەلا محەممەدی مورادڕەسووڵی، کادر و فەرماندەی شەهیدی حیزبی دێموکراتی کوردستانی ئێران، بە هۆی نەخۆشییەوە و لە تەمەنی ٨٩ ساڵیدا لە شاری ستۆکهۆڵمی وڵاتی سوید کۆچی دوایی کرد.
خاتوو خەدیجە لە شاری مەهاباد لەدایک بووە و کچی یەکێک لە تێکۆشەرانی کۆماری کوردستان بووە، کە دوای تێکچوونی کۆمار وەک زۆر تێکۆشەری دیکە ئاوارەی باشووری کوردستان بوون و لە شاری سلێمانی گیرسابوونەوە.
ناوبراو ژنێکی کوردپەروەر، ڕووخۆش، قسەخۆش، میواندۆست و بە بیرو باوەڕ بوو.
ناوبراو هەتا دوایین ساتەکانی تەمەنی وەفادار بە ڕێبازی دێموکرات مایەوە.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێ.
