بەرپرسی پەروەردەی شاری کۆیەشت سەر بە پارێزگای لوڕستان باسی لە داڕمانی شوێنە پەروەردەییەکان و هەبوونی ١٤ قوتابخانەی نیوەڕووخاو لەم شارە کرد.
ئەمین ئەمینی پوویا، لەمبارەوە وتی کە شوێنە پەروەردەییەکانی ئەم شارە ساڵانێکە داڕماون و ئیمکانات و بوودجەی پەروەردە، وڵامدەری نۆژەنکردنەوەی قوتابخانەکان نییە.
ناوبراو هەروەها ڕایگەیاند کە بۆ دروستکردنی قوتابخانەیەکی یەک پۆلی ٦٠٠ هەتا ٨٠٠ میلیۆن تمەن بوودجە پێویستە و لانیکەم یەک میلیارد و ٢٠٠ میلیۆن تمەن پارە پێویستە تاکوو قوتابخانەیەکی دوو پۆلی ساز بکرێت.
بەرپرسی پەروەردەی کۆیەشت ڕایگەیاند کە ١٤ قوتابخانەی ئەم شارە خراپ و نیوەڕووخاون و دەبێ هەرچێ زووتر نۆژەن بکرێنەوە.
هەر لەم پێوەندییەدا، حەمیدڕەزا خان محەممەدی، بەرپرسی ڕێکخراوی نۆژەنکردنەوە و پێداویستیی قوتابخانەکانی ئێران لە ڕەشەمەی ساڵی ڕابردوودا باسی لە هەبوونی ١٠٤ هەزار پۆلی ڕووخاو و داڕماو لە سەرتاسەری ئێراندا کردبوو.
