دەقی پەیامەکە بەم چەشنەیە:
بەڕێز پارتی ماف و ئازادی {HAK-PAR}
لەگەڵ سڵاو و ڕێزی دۆستانە
بەخۆشحاڵیەوە بانگهێشتنامەی بەڕێزتان بۆ بەشداریی حیزبی دێموکرات لە دەیەمین کۆنگرەتان بەدەستمان گەیشت.
بەناوی ڕێبەریی حیزبی دێموکراتی کوردستانی ئێرانەوە جوانترین پیرۆزباییتان پێشکەش دەکەین و هیوادارین دەیەمین کۆنگرەی حیزبەکەتان لە بەئەنجامگەیاندنی ئەرکەکانیدا سەرکەوتووبێت.
دۆستانی بەڕێز
جووڵانەوەی مافخوازی گەلی کورد بە هەلومەرجێکی هەستیاردا تێدەپەڕێ و ململانێی هێزە سیاسییەکان و وڵاتانی شوێندانەر لە ئاڵوگۆڕە سیاسییەکانی ناوچەکەدا گەیشتووەتە ئاستێک، سەرکردایەتی سیاسی کورد بەگشتی و تێکۆشەرانی کورد لە هەر کام لە بەشەکانی کوردستان پێویستە به خوێندنەوەیەکی ئەمڕۆییانە و واقیعبینانە شرۆڤەی بکەن و لەبەر ڕۆشنایی ئەم لێکدانەوەیەدا سیاسەتەکانیان ڕێک بخەن.
لە کەسمان شاراوە نییە نەیارانی گەلی کورد لەم بارودۆخە ئاڵۆزەدا لەسەر لەناوبردنی دەستکەوتەکانی گەلی کورد و هێرش و پەلامار بۆ سەر کوردستان و قوربانیکردنی خەڵکی کوردستان هاودەنگ و کۆکن. ئەم سیاسەتە دووژمنکارانەیەی نەیارانمان ئەرکی قورستر دەخاتە سەر شانی تێکۆشەرانی کورد کە بە ئیرادەیەکی یەکگرتووانەوە بەرگری لە خاک و خەڵکی کوردستان بکەن.
حیزبی دێموکراتی کوردستانی ئێران کە پێوەندییەکی دۆستانەی لە گەڵ ئێوەی بەڕێز هەیە بە هیواوە دەڕوانێتە کۆنگرەکەتان و جارێکی دیکە پیرۆزبایتان لێ دەکا و هەر لەم پەیامەشدا پیرۆزبایی لە سەرکردایەتی نوێی هەڵبژێردراوی کۆنگرەی دەیەمتان دەکا و ئارەزووی سەرکەوتنی زیاترتان بۆ دەخوازێ.
دووبارە پیرۆزبێت دەیەمین کۆنگرەی حیزبە تێکۆشەرەکەتان.
حیزبی دێموکراتی کوردستانی ئێران
ناوەندی پێوەندییە گشتییەکان
٢٠ی مەی ٢٠٢٤
