ڕۆژی پێنجشەممە، ١٣ی بانەمەڕ، مامۆستا قاسم زائر حیجازی باوکی دوو شەهیدی کوردستان لە تەمەنی ١٠٧ ساڵیدا ماڵاوایی لە ژیان کرد.
دوو کوڕی ناوبراو بە ناوەکانی جاوید و ڪامران لە ساڵی ٦٢ی هەتاویدا و لە ڕێزی ٥٩ لاوی مەهاباددا لەلایەن ڕێژیمی دژەکوردی ئێرانەوە لە سێدارە دراون.
کاک قاسم، مامۆستایەکی خۆشناو و دڵسۆز بوو کە بۆ ماوەی ٣٤ ساڵ ئەرکی پەروەردەی قوتابییانی لە مەهاباد لە ئەستۆ بوو.
ناوبراو پاش تەواکردنی خوێندن لە ساڵی ١٣١٦ـەوە کاری مامۆستایەتیی دەست پێ کرد و بۆ ماوەی چەند ساڵیش بەرپرسی "ماڵی لاوان"ی شاری مەهاباد و کۆمەڵی شیر و خورشیدی مەهاباد بوو.
تەرمی ناوبراو هەمان ڕۆژ لە گوڕستانی باغی فیردەوسی مەهاباد بە خاک ئەسپێردرا.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
