٢١ـەمین حەفتەی مانگرتن لە خواردنی ڕۆژانی سێشەممەی نا بۆ لە سێدارەدانی زیندانییان لە ئێران بەڕێوە چوو.
بەپێی ڕاپۆرتی ناوەندی مافی مرۆڤی ئێران، ڕۆژی سێشەممە ٢٩ی جۆزەردانی ١٤٠٣، سێشەممەکانی نا بۆ لەسێدارەدان و مانگرتن لە خواردن بۆ ٢١ـەمین حەفتە لەسەر یەک درێژەی هەبوو.
چالاکوانانی سیاسیی کەمپەینی "نا بۆ لە سێدارەدان" بۆ ٢١ـەمین حەفتەی لەسەر یەک مانیان لە خواردن گرت و بە دەرکردنی ڕاگەیەندرا، ''بارمتەگرتن لەلایەن کۆماری ئیسلامی" لە "مامەڵەی شەرمەزارکەری حەمید نووری"دا، ئەنجامدەرانی کوشتن و ئەشکەنجەدانیان لە دەیەی شەست شەرمەزار و ناڕەزایەتییان دەربڕی.
لە کاتێکدا مەحکومییەتە نێودەوڵەتییەکان بۆ پێشێلکارییەکانی مافی مرۆڤ لە ئێران زیادی کردووە، بەڵام "کۆماری ئیسلامی" لەپێناو پێشگرتن لە ڕاپەڕین و ناڕەزایەتیی خەڵک لە زیادکردنی سەرکوتەکانی لە کۆمەڵگەدا بەردەوامە.
ئەم مانگرتن لە خواردنە لە ڕۆژی سێشەممە ٩ی ڕێبەندانی ساڵی ڕابردوو، لە ناڕەزایەتییەک بەرامبەر بە لەسێدارەدانی زیندانییانی زیندانی قزلحسار دەستی پێکردووە و تا ئێستا هەموو سێشەممەیەک بەبێ پچڕان بەردەوام بووە.
