"نوورزاد عەلیمورادی"، پەنابەری کوردی خەڵکی شاری سەرپێڵ، پاش دیپۆرتکرانەوە لەلایەن وڵاتی نۆروێژەوە، لە فڕۆکەخانەی ئێستانبۆڵ هەوڵی خۆکوژیی دا.
بەپێی ڕاپۆرتی کوردپا، ڕۆژی پێنجشەممە، ٣٠ی جۆزەردان، نوورزاد عەلیمورادی، تەمەن ٣٣ ساڵ و چالاکی سیاسیی خەڵكی سەرپێڵ و پەیڕەوی ئایینی یارسان، پاش ٨ ساڵ چاوەڕوانی لە کەمپی "لینا"ی نۆروێژ بە مەبەستی وەرگرتنی مافی پەنابەری، دیپۆرتی ئێران کرایەوە و لە فڕۆکەخانەی ئێستانبۆڵی تورکیە لە کاتی ترانزیتی نێوان دوو گەشتی ئاسمانیدا، هەوڵی خۆکوژیی دا.
ئەم چالاکە سیاسییە کوردە بە مەبەستی پیشگرتن لە دیپۆرتکرانەوەی بۆ ئێران و لە ترسی بەرەوڕووبوونەوە لەگەڵ ئەشکەنجە دڕندانەکانی ڕێژیمی ئێران و سزادران بە سزای قورسی وەک لەسێدارەدان، دەستی داوەتە خۆکوژییەوە.
دۆخی تەندروستیی نوورزاد عەلیمورادی پاش خۆکوژی ناڕوونە و هێشتا هەڕەشەی دیپۆرتکرانەوە بۆ ئێرانی لەسەرە.
