ڕۆژی پێنجشەممە ١٠ی جۆزەردان کاک تاهیر عەبدوڵڵاهی ناسراو بە مەحموود سارتکەیی بەهۆی پیری و بەساڵاچووییەوە ماڵاوایی لە ژیان کرد.
کاک تاهیر لە بنەماڵەیەکی کوردپەروەر و حیزبی چاوی بە ژیان هەڵێنابوو؛ ناوبراو لە جووڵانەوەی پڕشکۆی ساڵانی ٤٦- ٤٧ لە بەرگی پیرۆزی پێشمەرگەدا لە خزمەت حیزبەکەیدا بوو و بەشداریی چالاکانەی هەبوو.
دوای تێکشکانی جووڵانەوەکە بەشداریی لە شۆڕشی باشووری کوردستاندا کرد و لە ساڵی ١٣٥٧دا کە ڕێژیمی پاشایەتی ڕووخا و حیزبی دێموکراتی کوردستانی ئێران تێکۆشانی ئاشکرای خۆی دەست پێکرد، کاک تاهیر وێڕای هاوسەنگەرانی لە باشوور گەڕایەوە و سەرلەنوێ چەکی پیرۆزی پێشمەرگایەتیی کردە شان و بۆ بەرگری لە گەل و نیشتمان وەک پێشمەرگە لە خزمەت حیزبەکەیدا بوو و لە شەڕی سێ مانگەدا وەک پێشمەرگەیەکی ئازا و فیداکار خزمەتی بە گەلەکەی کرد.
دواتر بەهۆی گرفتی ژیان و بنەماڵە بە ئاگاداریی حیزب وازی لە پێشمەرگایەتی هێنا بەڵام وەک کەسێکی دڵسۆز بە بیر و باوەڕی حیزبە کەی مایەوە وهەموو کات بنەماڵەکەیان پشتیوانی حیزب و پێشمەرگە بوون .
کاک تاهیر هەتا کۆتایی ژیانی وەفادار بە ڕێبازی شەهیدان و حیزبەکەی مایەوە.
شەهیدی فەرماندە هەمزە سارتکەیی برازای ناوبراوە.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکرای ناوبراو دەکات وو خۆی بە هاوبەشی خەمیان دەزانێت.
