بڕینی دار و بنبڕکردنی لێڕەوارەکانی کوردستان لە ناوچەکانی سەقز و بانە لەلایەن کەسانی هەلپەرستەوە، بە ئاگاداریی و چراسەوزی لایەنە پێوەندیدارەکانی ڕیژیم لەو دوو شارە بەردەوامە.
بەپێی زانیاریی گەیشتوو بە ناوەندی هەواڵی ڕاگەیاندنی حیزبی دێموکراتی کوردستانی ئێران، چەند کەسێک کە خەڵکی گوندەکانی ناوچەی سەرشیو و گەورکی سەقزن بە هاواهەنگی و ئاگاداریی بەرپرسانی ئیدارەی جەنگەڵبانی و ئیدارەی ژینگەی سەقز و بانە، بەبێ هیچ ترسێک ڕۆژ و شەو خەریکی بڕینی دارەکانی ئەو ناوچانەن.
بەرپرسانی ئەم ئیدارە ئاماژەپێکراوانە بە هاوکاریی لەگەڵ بەرپرسانی ئیدارەکانی ژینگە و جەنگەڵبانی پارێزگای سنە بەشیوەی ڕاستەوخۆ و لە ڕێگەی دەستوپێوەندییەکانیان و کەسانی هەلپەرستەوە، سیاسەتی وێرانکردنی سروشتەکانی کوردستان لەو ناوچانەدا بەڕێوە دەبەن.
هەر لەم چوارچێوەیەدا و لە درێژەی وێرانکردنی سیستماتیکی سروشتی کوردستان لەلایەن ڕێژیمەوە لە ساڵانی ڕابردوودا بەشێکی بەرچاو لە دارستانەکانی ناوچەی سەقز لەلایەن کەسانی نەفس نزم و سەر بە ڕێژیمەوە لەنێو چوون.
ناوچەکانی سەرشیو و گەورکی شاری سەقز زۆرترین زیانی ژینگەییان لە چوارچێوەی ئەم سیاسەتانەدا پێ گەیشتووە.
