ڕۆژی یەکشەممە ١٣ی جۆزەردان، مەلامحەممەد محەممەدیان، ناسراو بە مەلا محەممەدی خاڵەسووری ئەسپەمێزە، کەسایەتیی ناسراو و خاوەن پێگە و ئەندامی لەمێژینەی حیزبی دێموکرات لە سەردەشت کۆچی دوایی کرد.
مەلا محەممەد دەورێکی باڵای لە خزمەت بە بواری عیلم و ئەدەب و پەروەردەی کۆمەڵگادا هەبوو و هاندەری بەرەوپێشچوونی لاوان لە بواری زانست بوو.
مەلا محەممەد کەسایەتییەکی خاوەن پێگەی جامەوەری بوو و ڕۆڵی بەرچاوی لە سوڵح و ئاشتەوایی نێوان چین و توێژە جۆراوجۆرەکاندا دەگێڕا.
ناوبراو لە دەوارنی خوێندنی فەقێیەتی، هاوڕێی کەسایەتیی تێکۆشەر مامۆستا حەسەن شیوەسەڵی بووە و ساڵەکانی ١٣٥٩ و ٦٠ی هەتاوی بەرپرسی ڕێکخراوی حیزبی دێموکرات لە دۆڵی دەرماناوێ بووە.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
