دوانیوەڕۆی ڕۆژی سێشەممە، ١٩ی پووشپەڕ، کاک ئەمیر خەیاتی، لە تێکۆشەرانی ئازەری زمانی ورمێ، بە هۆی نەخۆشییەوە لە نەخۆشخانەیەکی وڵاتی ئاڵمان کۆچی دوایی کرد.
کاک "ئەمیر خەیاتی" کوڕی تێکۆشەری دێرین و کادری بەوەجی حیزبی دێموکرات شەهید "موهەندیس ڕەزا خەیاتی" یەکێک لە دامەزرێنەرانی ڕادیۆ دەنگی کوردستانی ئێران بوو کە لە بنەماڵەیەکی بە ئەسڵ "ئازەری"ی ئازادیخواز و باوەڕمەند بە خەباتی نەتەوایەتیی نەتەوەی کورد چاوی بە دونیا هەڵێنابوو.
کاک ئەمیر لە ساڵی ١٣٧٤ی هەتاویدا و لەژێر گوشاری ڕێژیمی سەرکوتکەری ئیسلامیدا وێڕای هاوژینەکەی خاتوو "ئێلهام چایچی" شاری ورمێ بەجێ دەهێڵن و ڕوو لە بنکەکانی حیزبی دێموکراتی کوردستانی ئێران دەکەن.
کاک ئەمیر بۆ ماوەیەکی زۆر وەک پێشمەرگەیەکی حیزبی دێموکرات لە بەشەکانی ئامووزش و ڕاگەیاندندا کاری کردبوو و هاوکات لەگەڵ دامەزرانی تلویزیۆنی تیشک لە ساڵی ١٣٨٥ی هەتاویدا ناوبراو وەکوو بەرپرسی بەشی ئایتی و گرافیکی ئەم تلویزیۆنە ئەرک وەئەستۆ دەگرێت.
کاک ئەمیر و خاتوو ئێلهامی هاوسەری ماندوونەناسانە لە ڕیزەکانی حیزبدا درێژەیان بە خەبات و تێکۆشان داوە.
خاتوو ئێلهام دەورەیەک سکرتێری یەکیەتیی ژنانی دێموکراتی کوردستانی ئێران بووە و یەکێک لەو ژنە چالاکانەی ڕیزەکانی حیزب بووە کە بەردەوامی لە چوارجیوەی مافی نەتەوەیاتی و مافی ژناندا هەنگاوی هەڵ گرتووە.
لە ساڵی ٢٠١٧دا، کاک ئەمیر وێڕای خاتوو ئێلهامی هاوسەر و کچەکەی نیلسوو، ڕێگای هەندەرانیان گرتە بەر و لە وڵاتی ئاڵمان گیرسانەوە.
کاک ئەمیر خەیاتی کەسایەتییەکی دڵسۆز و ماندوونەناسی خەباتی ڕەوای گەلەکەمان بوو کە لەدەستدانی خەسارێکی گەورە بۆ بزووتنەوەی ڕەوای گەلی کورد لە ڕۆژهەڵاتی کوردستان بەئەژمار دێت.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری و هەروەها هاوڕێ و هاوسەنگەرانی ناوبراو دەکات و خۆی بە هاوبەشی خەمیان دەزانێت.
