بەپێی دوایین ڕاپۆرتی ناوەندی ئاماری ڕێژیمی ئێران، پارێزگای کرماشان لە بەهاری ئەمساڵدا دووهەمین پارێزگای بێکاری ئێران بووە.
بەپێی ڕاپۆرتی ناوەندی ئاماری ڕێژیمی ئێران، لە دوای پارێزگای سیستان و بەلووچستان بە ڕێژەی ١٢.٣٪ بێكاری ، کرماشان بە دووهەمین پارێزگای بێکاری ئێران بە ڕێژەی ١٢٪ بێکاری دادەنرێت و دوای ئەوە پارێزگای لوڕستان بە ڕێژەی ١١.٣٪ بێكاری لە پلەی سێیەمین پارێزگای بێکار لە ئێراندایە.
جێگای ئاماژەیە کە ساڵی ڕابردوو ڕێژەی بێکاری لە کرماشان ١.٢٪ بووە و ئەمساڵ بە زیادبوونی ١.٨٪ ڕێژەی بێکاری گەیشتووەتە ١٢٪.
هەروەها تێکڕای ڕێژەی بێکاری لە ئێران ٧.٧٪ و بەپێی ئەم ئامارانە ڕێژەی بێکاری لە پارێزگای کرماشان ٤.٣٪ لە تێکڕای گشتی ڕێژه‌ی ئێران زیاترە.
بەپێی ئەم ڕاپۆرتە و بە پشتبەستن بە ئەنجامی ئامارگیریی هێزی کار، نرخی بەشداریی ئابووری و ڕێژەی بێکاری لە بەهاری ئەمساڵدا، نرخی بەشداریی ئابووری لەو ماوە زەمەنییەدا لە کرماشان ٤١.٢٪ بووە، و بە بەراورد لەگەڵ ساڵی ڕابردوو بە ڕێژەی ٤١.٤٪ دابەزیوە.
