شەوی چوارشەممە ٢٧ی پووشپەڕ شێخ ئازاد شەهابی کەسایەتیی خۆشناوی شاری سەقز لەلایەن چەند کەسێکی نەناسراوەوە تەقەی لێ کرا و هاوکات لەگەڵ دوو کەس لە موریدەکانی کوژرا.
بەپێی ئەو زانیارییانەی کە بە ناوەندی حیزبی دێموکراتی کوردستانی ئێران گەیشتوون دوێنێ شەو شێخ ئازاد شەهابی و دوو کەس لە موریدەکانی بە ناوەکانی دەروێش پەیمان و دەروێش پەرویز لە گەڕەکی تەپی ماڵانی شاری سەقز و لەکاتێکدا کە لە بارەگاکەی شێخ ئازاددا بوون لەلایەن چەند کەسێکی نەناسراوەوە تەقەیان لێ کراوە و گیانیان لەدەست داوە.
زانیارییەکان باس لەوە دەکەن کە شێخ ئازاد پاش چەند کاتژمێرێک بەهۆی توندیی برینەکانییەوە گیانی لە دەست داوە.
ناوبراو لە ناو موریدان و پەیڕەوانی تەریقەتی خۆیاندا جێگای متمانە و کەسێکی خۆشناو بووە.
تاکوو ئێستا زانیارییەکی زیاتر سەبارەت بەو کەسانەی کە تەقەیان کردووە و هۆکارەکانی ئەم ڕووداوە لەبەردەستدا نییە.
