ماوەی زیاتر لە شەش مانگە بەندکراوانی چەندین بەندیخانە لە ناڕەزایەتیدەربڕین بەرامبەر سزای لەسێدارەدان لە ئێران، هەڵمەتێکیان دژی سزای لەسێدارەدان دەست پێکردووە. ئەمجارە بەندکراوانی زیندانەکانی ورمێ، مەریوان، کامیاران، بانە و سەڵماس، لە سێشەمەیەکی دیکەدا پەیوەست بەم ناريزایەتیدەربڕینەوە بوون و مانیان لە خواردن گرت.
هەڵمەتی "سێشەممەکانی نا بۆ لەسێدارەدان" بە بەشداریی بەندکراوانی بەندینخانەکانی ورمێ، مەریوان، کامیاران، بانە و سەڵماس چووە نیو حەفتەی ٢٦ـەمەوە.
هەڵمەتی ڕۆژانی سێشەممەی نا بۆ لەسێدارەدان لەحاڵێکدایە کە لە سەروبەندی دەستبەکاربوونی مەسعوود پزێشکیان، لە ماوەی حەفتەی ڕابردوودا زیاتر لە ١٠ زیندانی لە سێدارە دراون کە دوو کەسیان زیندانیی سیاسی بوون.
هەڵمەتی سێشەممەکانی نا بۆ لەسێدارەدان لە ٩ی ڕێبەندانی ١٤٠٢ و هاوکات لەگەڵ لەسێدارەدرانی ٤ بەنکراوی سیاسیی کورد دەستی پێ کرد و بەشداربووانی ئەم هەڵمەتە ماوەی ٢٦ حەفتەیە بە مانگرتن داوای هەڵوەشانەوەی سزای لەسێدارەدانی بەندکراوان دەکەن.
