ڕۆژی پێنجشەممە ١٤ی پووشپەڕ، ژنە تێکۆشەرێکی کوردستان بەناوی پوورە بەگی ئیمامی خەڵکی گوندی قاسملوو سەر بە ناوچەی ورمێ بەهوی نەخۆشییەوە کوچی دوایی کرد.
پوورە بەگی یەکێک لەو ژنە تێکۆشەر و ئازایانە بوو کە لە حیزبدۆستی و پێشمەرگە خۆشەویستی سیمایەکی ناسراوی گوندی قاسملوو بوو.
لەگەڵ سەرکەوتنی شۆڕشی گەلانی ئێران و ئاشکرابوونی خەباتی حیزبی دێموکرات، پوورە بەگی وەک ژنێکی تێکۆشەر و پێشەنگ ژن و کچانی گوندی قاسملووی هان دەدا بۆ نانکردن و دروستکردنی خواردن بۆ مەقەڕی حیزب لەو گوندەدا و ماڵەکەی هەموو کات دەرگای بەرەڕووی پێشمەرگەدا کراوە بوو.
لەکاتی پەلاماری هێزەکانی ڕێژیمی ئێران بۆ سەر گوندی قاسملوو، ناوبراو ژنەکانی ئەو گوندەی هان دەدا بە دار و بەرد هێرش بکەنە سەر جاش و هێزەکانی سپای پاسداران .
پوورە بەگی جێگەی ڕێزی تایبەتی لاوانی شۆڕشگێڕی ناوچەی گەلی قاسملوو بوو و گەورەترین ئاواتی ژیانی ڕزگاریی کوردستان و وەدیهاتنی ئاواتی شەهیدان بوو.
تەرمی پیرۆزی پوورە بەگی لەنێو ئاپۆڕای خەڵکدا لە گۆڕستانی قاسملوو بە خاک سپێردرا.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
