فەرماندەی یەکەی پاراستنی ژینگەی کرماشان ڕایگەیاند کە ڕادەی ئاگرکەوتنەوە لەم پارێزگایە ٢٠ هێندە زیادی کردووە.
ئەسغەر ئاغاز فەرماندەی یەکەی پاراستنی ژینگەی کرماشان وێڕای ئاماژەدان بە زیادبوونی ئاگرکەوتنەوەکان لە کرماشان وتی: لە سەرەتای ساڵی ١٤٠٣ تا ئێستا، ٢٠ ئاگرکەوتنەوە بە ڕووبەری هەزار و ٩٠٠ هێکتار ڕووی داوە.
هەروەها لە ساڵی ڕابردوو لە هەمان کاتی دیاریکراوی ئەمساڵدا، ٤ ئاگرکەوتنەوە لە ڕووبەری ٩٠ هێکتار لە کرماشان ڕوویدابوو و لە ئەمساڵدا ئەو ڕێژەیە ٢٠ هێندە زیادی کردووە.
شایانی باسە زۆربەی ئەو ئاگرکەوتنەوانەی کە لە کرماشان ڕوویان داوە لە ناوچەی بۆزین و مەرەخێڵ، بێستوون، قەڵاجە، برنجان و قەراوێز بووە.
فەرماندەی یەکەی پاراستنی ژینگەی کرماشان وێڕای ئاماژەدان بە مەترسییەکانی ئاگرکەوتنەوەکانی دیکە تا مانگی خەزەڵوەر وتی کە: ٩٠٪ی ئەو ئاگرکەوتنەوانە هۆکاری مرۆڤیی لە پشتە.
زۆرینەی ئەو ئاگرکەوتنەوانە بەئەنقەست لەلایەن دەستوپێوەندییەکانی ڕێژیمەوە لە دارستان و لەوەڕگەکانی کوردستان و بەتایبەت دارستانەکانی زاگرۆس بەردەدرێن و بە یەکێک لە مەترسییەکان بۆ سەر ژینگەی کوردستان و زاگرۆس دادەنرێت کە ساڵانە چەند هەزار هێکتار لە دارستان و لەوەڕگاکان بەو هۆیەوە لەناو دەچن.
