هاوکات لەگەڵ وەرزی هاوین و بەرزبوونەوەی بێوێنەی پلەی گەرما لە سەرتاسەری کوردستان و ئێراندا، پچڕانی بەردەوام و بێ بەرنامەی کارەبا لە سنە، ناڕەزایەتیی هاووڵاتییان و بازاڕییانی ئەم شارەی بەدواوە بووە.
هەواڵدەریی دەنگوڕەنگی ڕێژیم لە سنە لە ڕاپۆرتێکدا پەرژاوەتە سەر پچڕانی بەردەوامی کارەبا لەم شارە و ڕایگەیاندووە کە نەبوونی کارەبا و ئاگادارنەکردنەوەی زۆرینەی خەڵک و کاسبکاران لە پجرانی کارەبا لە سنە تەنگی بە خەڵک هەڵچنیوە.
کوژاندنەوەی کارەبا بۆ دەسپێوەرگرتن لە بەکارهێنانی کارەبا، تاکوو ئێستا تەنیا ڕێکاری بەرپرسانی ڕێژیم و کۆمپانیای دابەشکردنی کارەبای پارێزگاکە بووە.
کۆمپانیای دابەشکردنی کارەبا لە سنە کە تەنیا ڕێگەی پێوەندیی بەکارهێنەران و خەڵکە، پێشی لە پێدانی زانیاری سەبارەت بە ڕێژەی بەکارهێنان و کەمبوونی کارەبا لەم پارێزگایە گرتووە.
یەکێک لە هاووڵاتییان لە ناڕەزایەتیدەربرێن بە وڵامنەدانەوەی کارناسانی کۆمپانیای دابەشکردنی کارەبا وتی کە پاش چاوەڕوانییەکی زۆر، هیچ وڵامێکی لەم کۆمپانیایە وەرنەگرتووە و تلفۆنی لەسەر داخراوە.
پچڕانی بەردەوامی کارەبا، ناڕەزایەتیی خەڵک و بەتایبەت کاسبکارانی لێ کەوتووەتەوە و هەندێک لە کاسبکاران لەمبارەوە ڕایانگەیاند کە بە سەرنجدان بە هەڵاوسان و دۆخی ئابووریی ئێستا و پێویستیی ڕاگرتنی هەندێ کەلوپەل لە یەخچاڵ و فریزر، ئەم پچڕانە مودیریەتنەکراوە بووەتە هۆی زیانێکی فراوان.
هەر لەم پێوەندییەدا، بەپێی ڕاپۆرتی کوردستان میدیا نەبوونی ئاو و کارەبا لە بۆکان تەنگی بە خەڵک هەڵچنیوە و بەرپرسانی ڕێژیمیش لەم پێوەندییەدا هیچ هەوڵێک نادەن.
بەپێی زانیارییەکان، کارەبا بە شێوەی دەورەیی لە گەڕەکەکان ئەپچڕێ و زۆربەی دووکاندارەکان لە بۆکان، بۆ پێشگرتن لە خراپبوونی کەلوپەلی دووکانەکانیان لە نەبوونی کارەبادا ناچارن کەڵک لە مۆتۆربەرق وەربگرن.
