دوایین ڕاپۆرتی هەڵسەنگاندنی کوالێتیی زانکۆکانی جیهان لە ماڵپەڕی ڕیزبەندی شانگهایدا، دابەزینی کوالێتیی زانکۆکانی ئێران و بەرزبوونەوەی پلەی بەشێک لە زانکۆکانی وڵاتانی کەنداوی فارس نیشان دەدات.
بەپێی ئەم ڕاپۆرتە، زانکۆکانی ئێران لە ڕیزی ١٠٠ زانکۆی سەرەکیی جیهاندا نین، لە ڕیزی ٥٠٠ زانکۆی سەرەکی تەنیا ٢ زانکۆ و لە نێوان هەزار زانکۆی سەرەکی ٩ زانکۆی ئێرانیش بوونیان هەیە.
ئەوە لەحاڵێکدایە زانکۆی مەلەک سعوودی عەرەبستان و سێ زانکۆی ئیسرائیلی لە ڕۆژهەڵاتی ناوەڕاستەوە لە ڕیزی ١٠٠ زانکۆی سەرەکیی جیهاندان.
لەم ڕیزبەندییەدا هەر سێ زانکۆی هاروارد، ئێستنفۆرد و ماساچۆسێت لە ئەمریکاوە وەک باشترین زانکۆکانی جیهان ناسێنراون، دواتر زانکۆی کەمبریج لە بریتانیا پلەی چوارەمی بەدەست هێنا. لە نێوان ٢٠ زانکۆی سەرەکیدا، ١٦ زانکۆی ئەمریکی و سێ زانکۆی بریتانیا و یەک زانکۆی فەرانسەیی هەیە.
لە نێوان زانکۆکانی ئێران، زانکۆی تاران لە ساڵی ٢٠٢٢دا لە نێوان پلەی ٣٠١ تا٤٠٠ جێگەی گرتبوو، بەڵام ئێستا لە نێوان پلەکانی ٤٠١ تا ٥٠٠ ی ئەم ڕیزبەندییەدایە و زانکۆی زانستی پزیشکیی تاران لە نێوان پلەی ٤٠١ هەتا ٥٠٠ ماوەتەوە و ٧ زانکۆی دیکەی ئێران لە نێوان پلەکانی ٧٠٠ هەتا هەزاردان.
لە ساڵانی ڕابردوودا و لەگەڵ قەیراناویبوونی بارودۆخی سیاسی، کۆمەڵایەتی و ئابووریی ئێران، شەپۆلێکی بەرفراوانی کۆچبەری لەنێو نوخبە و ئەکادیمیەکانی ئێراندا دروست بوو و هاوکات لەگەڵ زیادبوونی ڕۆیشتنی پرۆفیسۆرە بەناوبانگەکان لە زانکۆکان، ڕاپۆرتی جۆراوجۆر سەبارەت بە دابەزینی کوالێتیی خوێندن لە زانکۆکانی ئێراندا بڵاو بووەتەوە.
