ڕۆژی هەینی ڕێكەوتی ٢ی خەرمانانی ١٤٠٣ی هەتاوی، كاک سەردار ئیبتدا خەڵكی شاری مەهاباد، هاوکاری ماندوونەناسی كوردكاناڵ دوای چەند ساڵ بەربەرەكانێ لەگەڵ نەخۆشیی شێرپەنجە كۆچی دوایی كرد.
كاک سەردار لە ساڵی ٢٠٠٧ وەک ئەندامی حیزبی دێموکراتی کوردستانی ئێران لە كۆمیتەی سویددا دەستی بەكار كرد و لەگەڵ دامەزرانی كوردكاناڵ وەک یەكێک لە کامێراوانانی ئەو دەزگایە لە هەموو كۆڕ و كۆبوونەوە و خۆپێشاندان و كار و چالاكییەكانی حیزبی دێموكرات و ڕەوەندی كوردی ئامادە بوو و ساڵانێكی دوور و درێژ لە بەشی ڕاگەیاندنی حیزب لە كۆمیتەی سوید و دەرەوەی وڵاتدا وەک کامێراوان و وێنەگر خزمەتی بە گەل و نیشتمان كرد و ئارشیڤێکی بەنرخی بۆ نەوەی داهاتوو پاشەکەوت کرد .
کاک سەردار مرۆڤێكی خاكی و خاوەن هەڵوێستی كوردانە و نیشتمانی بوو کە ماوەی چەند ساڵێک بەهۆی نەخۆشی نەیتوانی وەک پێویست كار و چالاكیی سیاسی و كۆمەڵایەتی ئەنجام بدات. بەڵام بە دڵ و بە گیان لە تەنیشت حیزبی دێموكرات و ڕەوەندی كوردی لە تاراوگە مایەوە و لە ڕۆژە تایبەتەكاندا بەردەوام لە تەنیشت حیزب بوو.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
