چالاکێکی مافی مرۆڤ سەبارەت بە پرسی ئاگرکەوتنەوەکان لە کوردستان، وێڕای ئاماژە بە کەمتەرخەمیی بەرپرسانی ڕێژیم لەمبارەوە باسی لەوە کرد کە پرسی ژینگە لەلایەن ڕێژیمەوە وەک پرسێکی ئەمنییەتی چاوی لێ دەکرێت و سەبارەت بە هەوڵی کەسانی خۆبەخش لە کوژاندنەوەی ئاگرەکاندا ڕایگەیاند: ئەمە بەشێک لە خۆشەویستیی نیشتمانە.
پرسی ئاگرکەوتنەوەکان لە کوردستان پرسێکی گرینگ و جێی بایەخە؛ لە ماوەی چەند ڕۆژی ڕابردوودا ٥٠٠ هێکتار لە دارستان و لەوەڕگەکانی سەلاسی باوەجانی لە ئاگردا سووتان، هاوکات لەگەڵ ئەمەش ئەنجومەنی سەوز چیای مەریوان رایگەیاند کە لە ماوەی ٥ مانگی سەرەتای ئەمساڵدا، ١١٢ حاڵەتی ئاگرکەوتنەوە لە مەریوان و سەوڵاوا ڕوویان داوە.
کەیوان سەمەدی، چالاکی مافی مرۆڤ لەمبارەوە لە وتووێژێکدا لەگەڵ کوردکاناڵ، باسی لەوە کرد کە چەندین هۆکار لەوانە، تۆپبارانی ناوچە شاخاوی و دارستانەکان لەلایەن سپای پاسدارانەوە و هەروەها کەمتەرخەمییەکان لە پێوەندی لەگەڵ بەجێهێشتنی زبڵ وەکوو شیشە کە زۆرجار وەکوو زەڕەبین کار دەکەن لە هۆکارەکانی ئاگرکەوتنەوەکان لە کوردستانن.
بە وتەی سەمەدی، ساڵانە ڕێژەی ئاگرکەوتنەوەکان لە کوردستان زیاد دەکات و جیا لە سووتانی ڕووبەرێکی زۆر لە دارستانەکان، هەم ڕێژەی لافاوەکان زۆرتر دەبێتەوە و هەم ژمارەیەکی بەرچاو لە ئاژەڵەکان لەنێو دەچن. لەلایەکی دیکەشەوە، خاكی ئەو ڕووبەرەی کە لە ئاگردا سووتاوە، بۆ ماوەی چەندین ساڵ بە کەڵک نایەت و هیچ شتێکی لێ شین نابێت.
ئەم چالاکە مافی مرۆییە لەم وتووێژەدا باسی لە کەمتەرخەمیی ناوەندە پێوەندیدارەکانی ڕێژیم و نەبوونی ئێمکاناتی پێویست بۆ کوژاندنەوەی ئاگرەکان لەلایەن کەسانی خۆبەخشەوە کرد و ڕایگەیاند کە ئاگرکوژاندنەوەی خۆبەخش ڕێکار نییە.
ناوبراو ئاماژەی بەوە کرد کە پرسی ژینگە لای کۆماری ئیسلامی پرسێکی ئەمنییەتییە و کۆماری ئیسلامی ژینگە وەک پەناگەی حیزبەکانی ڕۆژهەڵات دەبینێ، هەر بۆیە ژینگەپارێزانیش وەک هاوکاری حیزبەکان و دوژمنی خۆی چاو لێ دەکات و هەوڵی دەسبەسەرکردن و سەپاندنی سزای قورس بەسەریاندا ئەدات.
سەمەدی لە درێژەدا سەبارەت بە هەوڵی کەسانی خۆبەخش لە کوژاندنەوەی ئاگرەکاندا ڕایگەیاند: ئەمە بەشێک لە خۆشەویستیی نیشتمانە، ناتوانین نیشتمانمان خۆش نەوێ و سووتانی دارستانەکان ببینین و هەڵوێستمان نەبێ.
ناوبراو لە درێژەدا سەبارەت بە ڕێکاری کوژاندنەوەی ئاگرەکان وتی: گرینگتر لە کوژاندنەوەی ئاگر، پێشگرتن لە پەرەسەندنی ئاگرەکەیە. کاتێ دارستانێک ئەسووتێ ناتوانین بە ئیمکاناتێکی کەمەوە بیکوژێنیەوە، یەکێک لە ڕێگاکان هەڵقەندنی زەوی بە مەودای ٢ مەتر لە ئاگرەکەیە، کە پێش بە پەرەسەندنی زیاتر بگرێت.
پرسی ئەگرکەوتنەکان لە ساڵانی ڕابردوودا، هەڕەشەیەکی جیددی بۆ سەر ژینگەی کوردستان بووە و لەمبارەوە سەرەڕای کەمتەرخەمیی بەرپرسانی ڕێژیم، خەڵک بە شێوەی خۆبەخشانە هەوڵی کۆنتڕۆڵکردنی ئاگرەکانیان داوە.
