فرکانس مەرگ!
پێژمان شەریعەتی
ڕووژ سیشەمە ٢٧ نۆخشان یەکیک لە گەوراترین هەڵامتەیل سایبری لە دریژەی تاریخ کریادە سەر حزبوللای لوبنان، وە پەی ئامارەگان ١٢ نەفەر کوشیانە و ٤٠٠٠ لە ترۆریستەیل حزبوللا زامدار بینە، ئی عەمەلیاتە لە ڕێ جاسازی و هەک کردن پەیجرەیل پەیوەندی لەبەینێ تروریستەگان کریاس ک فرەیگ لە کارناسەیل نزامی باس لەوە کەن ک گەوراترین هەڵامت سایبرییە لە دریژەی دیرووک.
لەی ناوە موجتەبا ئەمانی، سەفیر ئێران لە لوبنانیش لە ڕێ پەیجرەگان زامادار بییە.
خاڵ سەرەکی لێرەسە ک ترۆریسم ڕێژیم جومهوری ئسلامی لە جەهان لەسەر یک فرکانسە! یا توینیم بویشیمن ک مەرەکەز ئەسڵی و خەت دان وە تروریسم لە جەهان وە تایبەت ڕووژهەڵات ناوڕاس، ڕێژیم ترۆریست جومهوری ئسلامییە.
یە یەکمجار نییە ک ڕێژیم جومهوری ئسلامی لە ڕێ هەڵامات سایبری ، زەربەی گەروا خوەیدن و لە ساڵ ٢٠١٠ لە ڕێ ڤیروسێ ئستاکس نت، وە هزاران سانتریفیوژ نیروگایەیل هەستەیی ئێران لە کار کەفتن و بایس بی ک بەرنامەیل ئەتومی ڕێژیم دو ساڵ بکەفێدە دویا و ٦٠هزار کامپیوتر لە بنکەیل ئەتومی ئێران ڤیروسیەو بوون.
هەر لەیوا چەندین کارناس و دانشمەند هەستەیی ئێران لە ڕێ موبایلەگانیان کوشریان.
نموونەگان ترەک جوور: هەڵامات سایبری ئەڕای سەر سیستم نەفتی لە ئێران لە ساڵ ١٣٩١.
هەک کریان سایت مەرکەز ئامار و زانیاری شەهروەندەیل ئێرانی لە ساڵ ١٣٩٥.
ئاگر گردن زەنجیرەیی پتروشیمییەیل ئیران هەر لە ساڵ ١٣٩٥.
دو تەقین لە نیروگای نەتەنز و ئاگر گردنێ پتروسیمی ماهشەهر و ئەهواز لە ساڵ ١٣٩٩.
هەک کریان دوربینەیل زندان ئێوین، هەک کردن بیلبوردەیل ناو سار تێران و نووسین شوعار وە دژ خامنەیی لەسەریان و چەندین عەمەلیات ترەک،
ئی هەڵاماتەیل سایبری، گەوراترینەگانن و فرە عەمەلیات ترەکیش کریاس ک هەر لە ڕێ سایبری و هەک کردن زانیارییەگان بییە، لە کوشتن دانشمەندەیل هەستەیی ئێران تا کوشتن ئسماعیل هەنیە لە تێران، کە بەش ئەسڵی ئوپراسیونەگان لە ڕێ سایبەری بینە.
نزیک وە پانزە ساڵە ک ڕێژیم تروریست جومهوری ئسلامی، کەفتیەسە ناو مەیدان شەڕ سایبری و هەڵماتەیل سایبری وە دژ ئسرائیل و ئامریکا داشتێە ک هیچ کامیان وەگەردێ خاڵەیلییگ ک زەربە خواردێە هاوسەنگ نین.
لە ئاخرین ئوپراسیون کە دویکە کریا و ئسرائیل جاری ترەک نیشان دا ک لە ڕووی تکنولوژی و زانیاری دەس بانییگ وە نسبەت ڕێژیم جومهوری ئسلامی درێد و لە یک عەمەلیات توینست ٤هزار نەفەر زامدار بکەید و دەیان کەس بکوشێد.
هەرچەند ئی کردەوە لە ڕووی عەمەلیاتی گەورا و کەم وێنە بی، لە ڕووی ڕەوانی، فرەتر کارییە لەسەر ڕێژیم ئێران و گرووپەیل تروریستی ک دامەرزانێە و پالپشتی وەلێان کەید و تروریستەگان ئیران فرەتر لە جاران هەست وە نائەمنی کەن.
ئسرائیل وەی عەمەلیاتە، ئەمنیەت لە ناو سیستم تروریسم ڕێژیم هاوردە خوارترین حەد خوەی و پەیدا کردنێ ڕێ ترەک ئەڕای پەیوەندی لە ناو ئی سیستمە لە ناوچەگە و جەهان هەزینەی فرەیگ نەیدە بان دەس ڕێژیم.
لە لای تریش یەکیگ لە باسە ئەسڵییەگان، زامدار بوین موجتەبا ئەمانییە، ک سەفیر ئیرانە لە لوبنان.
برەیگ لە میدیاگان و کارناسەیل سیاسی و نزامی باس لەوە کەن ک چیو بوو یک سەفیر پەیجرییگ وە کار بارێ ک هاو فرکانسە وەگەردێ تاک و گرووپەیل تروریستی، ئەمانیگ ئی بابەتە ئەڕای فرەییگ لە ئیمە رووشنە ک ساختار ڕێژیم جومهوری ئسلامی لەسەر ئەساس ترور دانریاس و تروریسم ڕێژیم هەڕەشەیگە لەسەر ئەمنیەت جەهانی و ناوچەگە و لە ڕاسی هەر وە هاتن ئی ڕێژمە تا ئێرنگە، سەفیرەگان ڕێژیم لە وڵاتەیل ترەک کار سەرەکیان دیپلوماسی نەیوە، بەڵکە مەعموریەتیان ترور و ترسانن و شێوانن نەزم و ئەمنیەتە لە دونیا.
لە ڕاسی سفارەتخانەیل ڕێژیم لە وڵاتەیل، پایگای ترۆریستی و عەمەلیاتی بینە و هەن و فرەیگ لە کردەوە ترۆریستییەگانێ ڕێژیم جومهوری ئسلامی لە ڕێ سەفیر و سفارەتەگان بییە.
ئی عەمەلیاتە وە شێوازییگ بییە ک گشت وڵاتەیل و وە تایبەتی کارناسەیل شەڕ و تکنولوژی وە شێوەی هورد و شیکارانە پەیگیرن تا بزانن، ئوپراسیونەگە چیو و بەرنامە ئەڕای داڕشیاس و کام بەش لە تکنولوژی سەهم فرەتری داشتێە لە سەرکەفتن ئی عەمەڵیاتە.
لە لای تریش تا ئێرنگە وەرپرسەیل ڕێژیم وە شێوەی جدی لەبارەی ئی عەمەلیاتە باسییگ نیاشتنە و نیشان دەی تووش شوکیگ بینە و زەربەیییگ خواردنە ک جاری نیەتینە سەر خوەیان.
میدیاگان ڕێژیم وە بەردەوامی هەوڵ دەن ئی ئوپراسیونە بویچگ بکەن و خەسارەگە کەم نیشان بییەن و توان جووریگ دژکردەوە نیشان بیەن ک ڕووداو موهمیگ نەیوە، ئی کارە لە دوو بابەت سەرچاوە گرێد، یەکەم هەر لە ڕووی میدیایی و شەڕ ڕەوانی، دوویەم ترس ڕێژیم لە شەڕ ڕویەڕوو وەگەردێ ئسرائیلە.
وە گشتی دوای ئی ڕووداوەیلە، ئەوە ک وە خاسی دیارییە، ئسرائیل وە شێوەی کەلان ڕخنە کردیەسە ناو سیستم ڕێژیم جومهوری ئسلامی، و تا شوونیگ ڕەسێە ک باس لەوە کریەی جیا لە ئورگانەیل ئەمنیەتی و نزامی، ڕخنە کریاسە ناو بەت ڕەهبەری و ساڵانە چەندین وەرپرس پایە بەرز لە ناو ڕێژیم وە شێوەی شاراوە وە تاوان هاوکاری وەگەردێ ئسرائیل سزا دریەن.
لە ئاخرەو ڕووشنە ک ڕێژیم جیا لەو پروپاگاندا و هەڕەشە و شەڕ ڕەوانی ک کەیدن وە نسبەت توانایی نزامی و سیاسی و ئەمنیەتی خوەی، تا ئیسکە لە تەمان مەیدانەگان شەڕ شکست خواردێە و هەر ڕووژ سوتونیگ لە ساختار ڕێژیم ڕمیەی و ئاخر ئی شەڕەیلە ڕمیان یەکجاری ڕێژیم تروریست جومهوری ئسلامییە.
