خودایەیل درو
پژمان شەریعەتی
پزشکیان سەرۆککۆمار ڕێژیم جومهوری ئسلامی لە خڕبوین گشتی سازمان ملەل، توومارییگ لە درو و دەلەسە پێشکەش وە کۆمەڵگای جەهانی کرد.
قسەگانێ پزشکیان کوڵترین قسەیل بین لەبەین سوخەنرانییەگانێ سەرۆککۆمارەیل ڕێژیم و هەوڵدا کەمترین هەواشی ئەڕای ڕێژیم دروس بکەید و وە گشتی فرە موحافخزەکارانە بی و توینیم بویشیمن ک هیچ قسەییگ ئەڕای وەتن نیاشت.
بەش فرەییگ لە قسەیل پزشکیان تەنیا مەسرەف میدیایی داشت و لە ڕویو سیاسی هیچ دەروەچییگ ئەڕای چارەسەری و گەپ و گوفت واز نەکرد.
لە دەسوەپێکردنێ قسەگانی باس لەوە کرد ک مردوم ئێران، لە ڕاسات وفاق ملی وە من دەنگ دانە و یەیشە دەستوور خوداس!
لێرە پرسیار ئەوەسە، کام وفاق ملی؟
ئی وفاقە، سەرچەوە لە دو نوورین فاشیستی و ئیدئولوژیک گرێدن،یەکەم وە مانای یەکدەس کردن و لەوەرچەو نەگردنێ مافێ ملیەتەیل ناو موازنەی سیاسی ئێرانە، کە سەرچەوە لە عەقڵیەتییگ فاشیستی درێد و یەکیگ لە ستوونەیل ئەسڵی ساختار ڕێژیم جومهوری ئسلامییە.
نووڕین ترەک، وە پەی ئیدئولوژی مەزهەبییە، ک خوەیان وە نەمایەندەی خودا لە ڕیو زەیو دوینن و هەر کارییگ ک کەن ئویشن وە دەستوور خودا بییە.
لە دریژە، باس لەوە کەی ک ئمام عەلی وە یەکیگ لە فەرماندەگانی وەتێە ک بیلا مهرد گشت مەردوم بگرێد و وە خاسی وەگەردێ مەردوم بەرخورد بکە!
وەختییگ نووڕیمنە، هەڵسوکەفتێ ڕێژیم لە نزیک وەی پەنجا ساڵە، وە خاسی ئەڕامان دەرکەفێد ک مەنزووری: کوشتن و بڕین، ئعدام، شکەنجە، ژینوساید، ئاسمیلاسیون، شەڕ و ترۆر و هزاران دەرد ترەکە ک کردنەسە تویش ملەتەیل ئێران. یە لە حاڵییگە ک پزشکیان باس لە عداڵەت و ئاشتی و ئارامش لە جەهان کەی.
لە دریژەی باسەگانی، بەش فرەیگی چوودەسەر ئسرائیل و ئامریکا و جوور هەمیشە و لە نزیک وە چواردە دەقە سوخەنڕانی، دوکوتی لەبارەی ئی دو وڵاتەسە وە تایبەت ئسرائیل، یە لە حاڵیگە ک ئەو تریبونە دریەیدەی وڵاتەیل ک باس لە پیشنیار و گیر و گرفتەگان وڵات خوەیان بکەن و پاڵپشتی و یاری جەهانی ئەڕای پێشکەفتن وڵاتەگەیان وەدەس بارن و دەروەچییگ ئەڕای هاوکاری و گەپ و گوفت بکەنەو.
وە گشتی وەختی سەر و بنێ قسەگانی دەیمنەو یەک، توومارییگ بی پڕ لە درو و دەلەسە و مەزلووم نەمایی و وە خاس نیشاندان خوەیان و لاپووشانییگ بی ئەڕای کارەسات و قەیرانەیلییگ ک لە ئێران و ناوچەگە و جەهان دروس کردنە.
هەرچەن وە خاسی دیار بی مەتنییگ ک ئەڕای نویسانە، چەندین جار دەسکاری بییە و ئەو هەمکە توپوقە ک لە قسەگانی بی دیار بی ک خوەی وە خاسی نەخوەنیەسەی و زانێد ک هیچیگ جیا لە درو نییە.
لە لای تریش سایتەیل سەر وە سپای ترۆریست پاسداران ڕێژیم، دەسوەجی هاتنە دەنگ و بەش فرەیگ لە قسەگانی ڕەد کردن و عەباس عەراقچی و زەریف ک لەی هەیئەتە بەشدارن، وسەگانی ڕاسەو کردن.
هەیئەت سەد نەفەرەی پزشکیان، ئەڕای بەشداری لەی دانیشتنە دیار بی هەوڵیان ئەوسە، پەیوەندی وەگەردێ ئامریکا بگرن و خویان وە وڵاتە نزیک بکەنەو، ک دیارە ئەوەیش هیچ دەسکەفتییگ نیاشت.چوونکە کوشک چەرمگ و دەوڵەت بایدن گەپ و گوفت ڕەسمی ڕێکەفتن ڕەد کردنە و ئەوەیش هەڵەوگەردێدە سەر یە ک ئامریکا وەرەو هەڵوژانن سەرۆککۆمار چوود ، دەوڵەت ئێرنگە نیەتوینێد وە هیچ دانیشتن و قەرارداد ڕسمییگ بەشداری بکەیدن.
دیارە چەندین سەردان داشتنە و درن لە ئامریکا و وەگەردێ وڵاتەیل فرەییگ نیشن، ئەمانێگ دیپلوماسی ڕێژیم جومهوری ئسلامی وە شێوازییگە ک هیچ دەسکەفتییگ ئەڕای مەردوم ئێران نەیرێد و بگر گیچەڵ ترەکییگ وە قەیرانەگان مەردوم زیای کەیدن.
وە گشتی، مەسعود پزشکیان ک کەمترین دەنگ هاوردێە ئەڕای سەرۆککۆماری و لە میدیاگانێ ڕێژیم باس لەوە کردیاد ک هیچ بەرنامەییگ نەیرێد و تەنیا وە قسەی خامنەیی کەی، لە لای تریش لە سەفەرگەی وەرەو عەراق وەرجە یە ک بچوودە ئەو وڵاتە، باس لەوە کردن ناچارم کەن وە دیپلوماسی، کاریگ ک هیچ وەلێ نیەزانم و سەرم نیەود، ئێرنگە هاتێە وەرەو کۆمەڵگای جەهانی باس لە ئێران کەید و ئشارە وە ئەوە کەی ک گرش بوین ئابووری و سوڵح و ئاشتی بایس بەرقەرار بوود!
گشتمان وە خاسی زانیمن، ک نان ئی ڕێژیمە ها ناو شەڕ و ترۆر و شێوانن نەزم ناوچەگە و جەهان و تەنیا ڕێ ڕەسین وە پێشکەفتن و ئارامی لە ئێران و ناوچەگە نەمەنن ئی دەسەڵات دیکتاتوریەسە.
