![](/content/upload/1/news/74385_w920.jpg)
مایکل مەک کاڵ، سەرۆکی کۆماریخوازەکانی کۆمیتەی کاروباری دەرەوەی ئەنجومەنی نوێنەرانی ئەمریکا، خوازیاری سەپاندنی سزای نوێی ئەمریکا لەدژی گرووپی چەکداریی فەلەستینی حەماس و لایەنگرانی بوو.
ڕۆژی چوارشەممە ١٤ی خەرمانان ناوبراو لە ڕاگەیەندراوێکدا ڕایگەیاند: دەبێت حکوومەتی ئەمریکا هەموو ڕێگایەکی مومکین بەکار بهێنێت بۆ لێپرسینەوە لە حەماس لە بەرامبەر کردەوە دڕندەییەکانیاندا و حەماس ناچار بکات ئەو کەسانەی کە بە بارمتەی گرتوون ئازاد بکات.
لە بەشێکی دیکەی ڕاگەیەندراوەکەدا مەک کاڵ نووسیویەتی: دەمانهەوێت کە دەوڵەتی جۆ بایدێن سزای نوێ بەسەر گرووپی حەماس و لایەنگرانی لە سەرانسەری جیهاندا بسەپێنێت.
هەروەها ناوبراو ئاماژەی بەوەش کرد، کە کوشتنی دڕندانەی هرش گۆڵدبێرگ پۆلین و پێنج بارمتەی دیکە لە حەفتەی ڕابردوودا ئەوە دەردەخات کە کاتێکی زۆرمان بە دەستەوە نەماوە و دەبێت زۆرترین گوشار بخەینە سەر حەماس و لایەنگرانی بۆ ئەوەی بارمتەکان ئازاد بکەن.
هرش گۆڵدبێرگ پۆلین هاووڵاتییەکی تەمەن ٢٣ ساڵی ئەمریکی بوو، کە لەلایەن گرووپی حەماسەوە بە بارمتە گیرابوو و لەم دواییانەدا لەلایەن ئەو گرووپەوە کوژرا.
لەم دواییانەدا وەزارەتی دادی ئەمریکا بڕیاری ڕاگەیاندنی تاوان دژی "سەرکردە تیرۆریستییەکان"ی گرووپی حەماسی دەرکرد کە لەلایەن ڕێژیمی ئێرانەوە پشتیوانی دەکرێن و مەک کاڵ پشتیوانیی خۆی بۆ ئەم بڕیارەی ئەمریکا دەربڕیوە.
جێگای ئاماژەیە کە لە ١٣ی خەرماناندا وەزارەتی دادی ئەمریکا بە فەرمی یەحیا سینوار و سەرکردە باڵاکانی دیکەی گرووپی حەماسی بە تاوانی دەیان ساڵەی سەرکردایەتی و پشتیوانیی دارایی ئەو گرووپە و تێرۆر دژی هاووڵاتییانی ئەمریکایی تۆمەتبار کرد.