ئەمریکا بۆ بەهێزکردنی ئاسایش و لە ئەگەری پێویستبووندا بۆ بەرگریکردن لە ئیسرائیل، چەند هەزار سەربازی زیاتر ڕەوانەی ڕۆژهەڵاتی نێوەڕاست دەکات.
سابرینا سینگ، وتەبێژی پێنتاگۆن ڕاگەیاندووە، ئەو زیادکردنە بریتییە لە ناردنی هێز و فڕۆکە شەڕکەرەکان و جێگیرکردنی چەندین ئێسکادران جێتی شەڕکەر وەکوو جێتیA10 و شەڕکەرەکانی F15 و F16 وهەروەها . F22
ئەم بڕیارە دوای هێرشەکانی ئەم دواییەی ئیسرائیل بۆ سەر لوبنان و کوژرانی حەسەن نەسروڵڵا، ڕێبەری حیزبوڵڵای لوبنان درا.
بەپێی وتەی وتەبێژی وەزارەتی بەرگریی ئەمریکا، ئەو فڕۆکە و جێتە شەڕکەڕانە بۆ یارمەتیدان و پاراستنی هێزەکانی ئەمریکا جێگیر کراون.
کوژرانی نەسروڵڵا، کەسی نزیک لە عەلی خامنەیی ڕێبەری ڕێژیمی ئیسلامیی ئێران و پەرەسەندنی بەرچاوی شەڕی ناوچەی ڕۆژهەڵاتی نێوەڕاست بووەتە هۆی ناردنی هێز و بەهێزترکردنی پێگەی ئامریکا و هاوپەیمانانی لە ڕۆژهەڵاتی نێوەڕاست.
