لە ڕۆژانی ڕابردوودا، کەسایەتییەکی حیزبدۆست بە ناوی سدیق مستەفازادە، خەڵکی بانە، لە تەمەنی ٦٧ ساڵیدا کۆچی دوایی کرد.
سێ برای ناوبراو بە ناوەکانی خەلیل شەوباش، عەزیز و جەلیل مستەفازادە لە ڕیزەکانی حیزبی دێموکراتدا پێشمەرگایەتییان کردووە و گیانیان لە ڕێگەی ئازادی و سەربەستی نیشتمانەکەیاندا فیدا کردووە.
کاک سدیق ساڵی ٥٤ لە بانەوە چووە تاران و دواتریش لە شیراز گیرسایەوە. ناوبراو بۆ ماوەی ١٠ ساڵ بەرپرسی بێهزیستیی لارستان و بێهیار بوو و کارناسیی ئێفتخاریی پەرستاری و دوکترای ئێفتخاریی لەلایەن بێهزیستییەوە پێ درابوو.
ناوبراو لە ساڵی ٦٢ی هەتاویدا، بە هۆی ئەوەی کە لەگەڵ شەهید جەلیلی برای هاوکاریی هەبووە و دەرمانی بۆ دەناردن لەلایەن ڕێژیمەوە گیرا و ئەشکەنجە درا.
کاک سدیق کەسایەتیی دیار و دۆستی حیزب و دڵسۆزی بزووتنەوەی کوردستان بوو.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
