سزای سێ ساڵ بەندکرانی ئازاد عەباسی، بەرپرسی ئەنجومەنی فەرهەنگی- کۆمەڵایەتیی "نۆژین" و وانەبێژی زمانی کوردی لە دادگای پێداچوونەوەدا بۆ یەک ساڵ بەندکران کەم کرایەوە.
ناوبراو لەلایەن دادگای پێداچوونەوەوە بە تۆمەتی "بێڕێزی بە ڕێبەر" بە هەشت مانگ بەندکران و بە تۆمەتی "پڕوپاگەندە دژی نیزام" بە چوار مانگ بەندکران سزا دراوە و ئەم سزایە لە ماوەی ڕۆژانی ڕابردوودا لە بەندیخانەی قوروە بە ناوبراو ڕاگەیەندراوە.
ڕۆژی ١٠ی خەزەڵوەری ١٤٠٣، ئازاد عەباسی بە مەبەستی جێبەجێکرانی سزای دوو ساڵ بەندکران دەسبەسەر کرا و بۆ بەندیخانەی قوروە ڕاگوێزرا.
سروە ڕەحمانی، هاوسەری ئازاد عەباسی لە ئینستاگرامەکەی خۆیدا بە بڵاوکردنەوەی پەڕەیەک لە حوکمی هاوسەرەکەی کە ڕێکەوتەکەی ٢٩ی ڕێبەندانی ١٤٠٢یە و لەلایەن لقی ١٠٢ی دادگای کەیفەری ٢ی دێولانەوە دەرکراوە، نووسی؛ ئازاد بە بێ بەشداریی خۆی بە تۆمەتی "هەوڵدان دژی تەناهیی نەتەوەیی" بە ٥ ساڵ بەندکران، بە تۆمەتی "بیڕێزی بە ڕێبەر" بە دوو ساڵ بەندکران و بە تۆمەتی "پڕوپاگەندە دژی نیزام" بە یەک ساڵ بەندکران و سزا دراوە. پاش ناڕەزایەتیدەربڕین لە تۆمەتی "هەوڵدان دژی تەناهیی نەتەوەیی" بێتاوان ناسراوە بەڵام سزاکانی دیکە وەک خۆیان پشتڕاست کراونەتەوە.
ئازاد عەباسی تاکوو ئێستا چەندین جار دەسبەسەر کراوە و سزای بەسەردا سەپێندراوە.
ئازاد عەباسی لە ڕۆژی ٢٤ی بەفرانباری ١٣٩٨ لە کاتی بەدواداچوون بۆ دۆخی برا و براژنەکەی دوای دەسبەسەرکرانیان لە ئیتلاعاتی دێولان، لەگەڵ هەڵسوکەوتی توندی هێزە ئیتلاعاتییەکان بەرەوڕوو بووەوە و دواتر دەسبەسەر کرا. ناوبراو بە بێ بەڵگەی یاسایی دەسبەسەر کرا و بۆ شوێنێکی نادیار ڕاگوێزرا و بۆ ماوەی دوو مانگ لە ژووری تاکەکەسی ڕاگیرا.
