بەپێی ڕاپۆرتی هەواڵدەریی هێرانا و لە بەردەوامیی کۆبوونەوە ناڕەزایەتییەکان لە ئێران، ڕۆژی یەکشەممە ٢٠ی خەزەڵوەر لانیکەم ١٣ کۆبوونەوەی ناڕەزایەتی لە شارەکانی کوردستان و ئێران بەڕێوە چووە.
ئەم هەواڵدەرییە مافی مرۆییە ڕایگەیاندووە کە ژمارەیەک لە خانەنشینکراوانی "تەئمینی ئیجتماعی" لە شارەکانی کرماشان، ئەهواز، شووش و ڕەشت لە بەردەم بیناکانی "تەئمین ئیجتماعی" لەو شارانەدا کۆبوونەتەوە و خوازیاری پێڕاگەیشتن بە مافەکانیان بوون.
لە سێ کۆبوونەوەی ناڕەزایەتی دیکەدا ژمارەیەک لە کارمەندانی زانکۆی زانستە پزشکییەکانی قوم، کارمەندانی تاقیگە و ڕادیۆلۆژیی نەخۆشخانەیەک لە قەزوین و هەروەها ژمارەیەک لە "ماما"کانی نەخۆشخانەی شووش، کۆبوونەوەی ناڕەزایەتییان بەڕێوە بردووە و داواکاری گەیشتن بە مافە پێشیلکراوەکانیان بوون.
بەپێی ئەم ڕاپۆرتە هەر لەم ڕۆژەدا ژمارەیەک لە تاکسیدارەکانی تاران، مەشهەد، هەمەدان و مەلایر لە بەردەم بینای وەزارەتی نێوخۆی ڕێژیمدا لە تاران کۆبونەوەی ناڕەزایەتییان بەڕێوە بردووە.
هێرانا زیادی کردووە کۆمەڵێک لە مامۆستایانی خانەنشینکراو لە چەند پارێزگای ئێرانەوە چوونەتە تاران و لە بەردەم بینای وەزارەتی پەروەردە و بارهێنان کۆبوونەتەوە و سەبارەت بە پێڕانەگەیشتن بە مافەکانیان ناڕەزایەتییان دەربڕیوە.
هەروەها لە دوو کۆبوونەوەی دیکەدا لە شارەکانی ئیسفەهان و تاران، ژمارەیەک لە خانەنشینکراوانی پیشەسازیی پۆڵا لە بەردەم سەندووقی خانەنشینکراوانی ئەم دوو شارە کۆبوونەوە و دروشمیان دا.
لە درێژەی کۆبوونەوە ناڕەزایەتییەکان لە شارەکانی ئێران لەم ڕۆژەدا، کۆمەڵێک لە ماڵخوراوانی دوو شیرکەتی "ڕیگان خۆدرۆ" و "شەهری خۆدرۆ" لە تاران و هەروەها ژمارەیەک لە دەسفرۆشان و میوەفرۆشانی ئێرانشاری سەر بە پارێزگای سیستان و بەلووچستان کۆبوونەوەی ناڕەزایەتییان بەڕێوە بردووە و داوای مافە پێشێلکراوەکانی خۆیان کردووە.
هاوکات لەگەڵ قەیرانی ئابووری و سیاسەتە هەڵەکانی رێژیم لەم بوارەدا، بەتایبەتی لە ساڵانی ڕابردوودا زۆرترین کۆبوونەوە ناڕەزایەتییەکان بەم دۆخە بەڕێوە چووە و ڕێژیمیش نە تەنیا وڵامدەری داواکارییەکانی خەڵک نییە بەڵکوو توانای چارەسەرکردنی کێشە و قەیرانەکانیشی نەماوە.
