ڕۆژی یەکشەممە ٤ی سەرماوەزی ١٤٠٣، شاندێكی سەركردایەتیی پارتی سۆسیالیستی كوردستان بە سەرپەرستی كاک بایرام بۆزیەل، سەرۆكی گشتیی پارتی سۆسیالیستی كوردستان سەردانی حیزبی دێموكراتی كوردستانی ئێرانیان كرد و لەلایەن هەیئەتێکی حیزبی دێموكراتەوە بە سەرپەرستیی کاک مستەفا هیجری، بەرپرسی ناوەندی بەڕێوەبەریی گشتیی حیزبی دێموکراتی کوردستانی ئێران، پێشوازییان لێ كرا.
شاندی دوو لایەن بە هەڵسەنگاندی دۆخی قەیراناویی ڕۆژهەڵاتی ناوەڕاست و ئالنگارییەكانی پەیوەندیدار بەو شەڕ و ململانێیە، تیشكیان خستە سەر دۆخی كورد لە هەركام لە وڵاتانی ناوچە و پێداگرییان لەسەر هاوكاریی نێوان لایەنە سیاسییەكانی كوردستان كرد كە بتوانن لەبەر تیشكی ئەو قۆناخە نوێیە خزمەت بە پێشخستنی دۆزی نەتەوەیی كورد لە هەركام لە بەشەكانی كوردستان بۆ وەدیهێنانی مافەكانیان بكەن.
