دوو کۆڵبه‌ری کورد به‌ ته‌قه‌ی ڕاسته‌وخۆی هێزه‌ سه‌رکوتکه‌ره‌کانی ڕێژیم،‌ له‌ به‌رزاییه‌کانی نه‌وسوود و پیرانشار به‌ توندی بریندار بوون.

به‌پێی ڕاپۆرتی ڕێکخراوی مافی مرۆڤی "کوردپا"، سه‌رله‌به‌یانی ڕۆژی چوارشه‌ممه‌ ٢١ی سه‌رماوه‌ز، کۆڵبه‌رێک به‌ ناوی "مه‌سعه‌ب سه‌بزه‌واری" خه‌ڵکی ئاوایی "قشڵاق" له‌ به‌شی شاهۆی سه‌ر به‌ ڕوانسه‌ر به‌بێ ئاگادارکردنه‌وه‌ی پێشوه‌خته‌وه‌ و ته‌قه‌ی ڕاسته‌وخۆی هێزه‌ سه‌رکوتکه‌ره‌کانی ڕێژیم له‌ به‌رزاییه‌کانی نه‌وسوود به‌ توندی بریندار بوو.

ئه‌و کۆڵبه‌ره‌ به‌هۆی تەقەکردن لە ده‌موچاوی به‌ توندی بریندار بووه‌ و ئێستا له‌ به‌شی پێڕاگه‌یشتنی تایبه‌ت له‌ نه‌خۆشخانه‌ی تاڵه‌قانیی کرماشان خه‌وێندراوه‌ و دۆخی ته‌ندروستیشی ناجێگیره‌.

"کوردپا" هه‌روه‌ها ئاماژه‌ی به‌وه‌ کردووه‌ له‌ هه‌مان کاتدا کۆڵبه‌رێکی دیکه‌ به‌ ناوی "عه‌بدوڵڵا مه‌عرووفی"، خه‌ڵکی ئاوایی "گه‌زگه‌سک" سه‌ر به‌ پیرانشار به‌هۆی ته‌قه‌ی ڕاسته‌وخۆی هێزه‌کانی ڕێژیم‌ له‌ به‌رزاییه‌کانی ناوچه‌ی "سێ چۆمان" بریندار بووه‌.

ئه‌و کۆڵبه‌ره‌ بۆ چاره‌سه‌ری پزیشکی بۆ ناوه‌نده‌ ده‌رمانییه‌کان ڕاگوێزراوه‌.

شایانی باسه‌ هێزه‌ چه‌کداره‌کانی ڕێژیم به‌ بێ ئاگادارکردنه‌وه‌ی پێشوه‌خته‌ ته‌قه‌یان له‌و کۆڵبه‌رانه‌ کردووه‌.