سەرچاوە میدیاییەکانی ئێران باسیان لە واژۆکردنی بەڵگەنامەی هاوکاری لە نێوان دەوڵەتی ژاپۆن و کۆماری ئیسلامی سەبارەت بە جێبەجێکردنی پڕۆژەی "گەشەی سیستمی پاراستنی زەلکاوەکان لە گۆلی ورمێ و ناوچەکانی دەوروبەری"، کردووە.
بەپێی زانیارییەکان دەوڵەتی ژاپۆن بۆ جارێکی دیکە و لە چوارچێوەی ئەم پڕۆژەدا بڕە پارەی ٤.٥ میلیۆن دۆلار یارمەتی کۆماری ئیسلامی ئەدات.
ئەم سەرچاوانە لەم پێوەندییەدا زیادیان کردووە کە پڕۆژەکە لە ئەمساڵەوە تاکوو ساڵی ٢٠٢٨ی زایینی بە هاوکاریی ڕێکخراوی پاراستنی ژینگە و ڕێکخراوی خۆراک و وەرزێڕیی نەتەوە یەکگرتووەکان (فائۆ) دەچێتە قۆناغی جێبەجێکردنەوە.
ئەمە جاری یەکەم نییە کە دەوڵەتی ژاپۆن بۆ بووژانەوە و پاراستنی گۆلی ورمێ یارمەتی کۆماری ئیسلامی ئەدات.
بە وتەی ئەحمەدڕەزا لاهیجانزادە، جێگری ژینگەی دەریایی و زەلکاوەکانی ڕێکخراوی پاراستنی ژینگەی ڕێژیم، ژاپۆن چەند ساڵ لەمەوبەر ٣ میلیۆن دۆلاری دیکە یارمەتی بۆ ئەم مەبەستە دابوو.
ئەوەی کە ڕوونە تاکوو ئێستا لایەنە پێوەندیدارەکانی کۆماری ئیسلامی هیچ بەرچاوڕوونیێکیان سەبارەت بە چۆنییەتی خەرجکردنی ئەم پارانە و کاریگەرییەکانی لە سەر باشترکردنی دۆخی گۆلێ ورمێ ڕادەست نەکردووە.
ڕیکخراوی پاراستنی ژینگەی ڕێژیم و لایەنە پێوەندیدارەکانی ساڵانێکە ڕایدەگەیەنن کە بەردەوام لە هەوڵی ئەوەدان تاکوو پێش بە وشکبوونی گۆلی ورمێ بگرن و بوودجە بۆ بووژانەوەی تەرخان دەکەن، بەڵام تاکوو ئیستا نەیانتوانیوە پێش بەم دۆخە قەیراناوییە بگرن.
گۆلی ورمێ گەورەترین گۆلی ئاوی سوێری ڕۆژهەڵاتی نێوەڕاست و هەروەها گەورەترین گۆل لە ئاستی ئێراندایە کە لە ژیر سێبەری ناکارامەیی سیاسەتەکانی کۆماری ئیسلامی لەپێوەندیی لەگەڵ پاراستنی ژینگەدا، نزیک بە ٩٦ لەسەدی وشک و بەرەو وشکبوونی تەواو دەڕوات.
