ڕۆژی ۲٥ی سەرماوەزی ۱٤۰۳ی هەتاوی، کاک عارف تاراج خەڵکی ئاوایی ولەژێر لە دەوروبەری شاری مەریوان و لە تەمەنی ٨٨ ساڵیدا بە هۆی نەخۆشی و بەساڵاچووییەوە کۆچی دوایی کرد.
کاک عارف تاراج باوکی پێشمەرگەی شەهید ڕەفیق تاراجە کە ۲۱ی گەلاوێژی ساڵی ٦۷ لە جاددەی مێراو لە ناوچەی ژاوەرۆی سنە لە شەڕ لە گەڵ جاش و پاسدار شەهید بوو.
کاک عارف پیاوێکی جێگەی ڕێز و حورمەتی خەڵک بوو، بەهۆی شۆڕشگێربوونی بنەماڵەکەی، خۆشەویستی خەڵکی ولەژێر و دەورووبەری بوو، بەداخەوە مەرگ مەجالی پێ نەدا ئازادیی گەل و نیشتمانەکەی ببینێ.
تەرمی کاک عارف تاراج لەنێو ئاپۆرای خەڵکی ولەژێر و دەروبەری بە خاکی پیرۆزی نیشتمان سپێردرا.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
