هاوسەری مەلا محەممەد ڕەبیعی لە ساڵڕۆژی کوژرانی هاوسەرەکەیدا بە بڵاو کردنەوەی ڤیدیۆیەک دەڵێت ئێستاش داوای خوێنی هاوسەرەکەم دەکەم.
لەم گرتە ڤیدیۆییەدا، ناوبراو لەکاتی ناساندنی خۆیدا دەڵێت: ''من عایشە مەفاخیری، هاوسەری شەهید مامۆستا محەممەد ڕەبیعی، یەکێک لە قوربانییانی قەتڵە زنجیرەییەکان لە کرماشان لە ساڵی ١٣٧٥، دوای ٢٨ ساڵ هێشتا داوای خوێنی هاوسەرەکەم دەکەم.''
ڕێکەوتی ١٢ی سەرماوەزی ساڵی ١٣٧٥ی هەتاوی، تەرمی بێ گیانی مەلا محەممەد ڕەبیعی، پێشنوێژی پێشووی سونییەکانی شاری کرماشان، لەسەر شەقامێکی شاری کرماشان دۆزرایەوە.
پزیشکی دادوەریی پارێزگای کرماشان دوای دۆزرانەوەی تەرمی مامۆستا ڕەبیعی، هۆکاری مردنەکەی بە جەڵتەی دڵ لەقەڵەم دا، بەڵام لایەنگران و خەڵکی کرماشان و شارەکانی دیکەی کوردستان ئەوەیان ڕەت کردەوە و ڕایانگەیاند، مامۆستا ڕەبیعی لەلایەن هێزە ئەمنییەکانی ڕێژیمی ئیسلامیی ئێرانەوە سەرلەبەیانی ڕفێندراوە و دواتریش کوژراوە.
دوای ٢٨ ساڵ تێپەڕبوون بەسەر تێرۆری مەلامحەممەد ڕەبیعی، جگە لەوەی کە هەندێک کەس بەهۆی ناڕەزایەتیدەربڕینەوە سزا دران، هێشتا لێکۆڵینەوەیەکی بێ لایەن لەبارەی هۆکاری گیانلەدەستدانی نەکراوە و بنەماڵەی ئەو کەسانەش کە ڕۆڵەکانیان لە ناڕەزایەتییەکاندا کوژران، هێشتا چاوەڕێی سزادانی بکوژەکان دەکەن.
مامۆستا ڕەبیعی کەسایەتیی سیاسی، ئایینی، شاعیر و نووسەری کورد، ساڵی ١٣١١ لە گوندێکی ناوچەی دیواندەرە لە دایک بوو و خوێندنی مامۆستایەتیی لە باشوور و ڕۆژهەڵاتی کوردستان تەواو کردبوو.
