مستەفا قازیزادە بەرپرسی بەشی پێوەندییەکانی دەورەوەی وڵاتی ئاڵمان لە سەر بانگهێشتنی فەرمیی پێتر هایت نوێنەری حیزبی دیمۆکراتی ئازاد، لە ڕۆژی ١٧ی دێسامبری ساڵی ٢٠٢٤ بەشداریی کۆبوونەوەیەکی هەمەلایەنەی مافی مروڤی پارلەمانی ئەو وڵاتەی کرد.
بابەتی تایبەتی ئەو کۆبوونەەویە پاراستنی ئەمنییەتی دژبەرانی وڵاتانی دیکتاتۆری بوو کە پەنایان بۆ وڵاتی ئاڵمان هێناوە.
بەرپرسی بەشی دژی تێرۆریسمی وەزارەتی ناوخۆ، بەرپرسی مافی مرۆڤی وەزارەتی دەرەوە، چوار پارلەمانتاری فراکسیۆنەکانی پارلەمان، چالاکانی مافی مرۆڤی ئۆیغورەکان، چین، ڤیێتنام، تاجیکستان و بێلاڕووس و چەند ڕۆژنامەوانی میدیای ئاڵمان و نوینەری ڕێکخراوی چاوەدێری مافی مروڤ و ڕاپۆرتنووسانی بێسنوور بەشدار بوون.
هەموو لایەنەکان پێداگرییان کرد کە کاربەدەستانی ئاڵمان دەبێ زیاتر هەوڵی دابینکردنی ئەمنییەتی گیانی و ئازادی هەوڵ و تێکۆشانی دژبەرانی ئەو وڵاتانە بکەن، بۆ ئەوەی دێمۆکراسی لە وڵاتانی ژێر دەسەڵاتی دیکتاتۆری پەرە بستێنێ.
مستەفا قازیزادە بە ئاماژە کردن بە تێرۆری نەمر دوکتور شەرەفکەندی لە ساڵی ١٩٩٢ ئەوەی بیری بەشداران هێنایەوە کە کۆماری ئیسلامی لە سەرەتای دامەزرانییەوە سەدان دژبەری لە دەرەوی وڵات تیرۆر کردووە.
ئەو داوای کرد کە سیخوڕان، بکەران و دەستوپێوەندییەکانی کۆماری ئیسلامی لە ئاڵمان بناسێندرین و لەو وڵاتە دەر بکرێن.
