هاوکات لەگەڵ پەرەسەندنی شەپۆلی دەسبەسەرکرانی هاووڵاتییان لە کوردستان، هێزەکانی ڕێژیم هێرشیان کردووەتە سەر گوندی سەهۆڵان، سەر بە شاری مەهاباد.
بەپێی ڕاپۆرتی چاو نیووز و لە زاری سەرچاوەیەکی ئاگادارەوە، ڕۆژی پێنجشەممە ٦ی بەفرانبار، ژمارەیەکی بەرچاو لە هێزە سەرکوتکەرەکانی کۆماری ئیسلامی بە چەند ماشینی پلاک شەخسییەوە هێرشیان کردووەتە سەر گوندی سەهۆڵان و هەڕەشەیان لە خەڵکی ئەم گوندە کردووە.
هێزە لیباس شەخسییەکانی ڕێژیم بە بێ بەڵگەی یاسایی هێرشیان کردووەتە سەر ماڵی چەندین هاووڵاتی و پاش پشکنینی ماڵەکانیان، دەستیان بە سەر مۆبایلی سێ هاووڵاتیدا گرتووە.
ئەم سێ هاووڵاتییە کە مۆبایلەکانیان لێ وەرگیراون بانگی ئیتلاعاتی کراون.
چاو نیووز هەروەها ڕایگەیاندووە کە مامۆستای ئایینیی سەهۆڵانیش لەلایەن هێزەکانی ڕێژیمەوە هەڕەشەی لێ کراوە کە لە کارەکەی دوور دەخرێتەوە.
