دوای ساڵێک لە داوای پێداچوونەوە بە حوکمی داسەپاوی لەسێدارەدان بۆ هەریەک لە بەندکراوانی سیاسیی کورد؛ پەخشان عەزیزی و وریشە مرادی، بەداخەوە پارێزەری پەخشان عەزیزی ڕایگەیاند کە حوکمی لەسیدارەدانی ناوبراو لە لایەن دیوانی باڵای دادوەریی ڕێژیمەوە تەئید کراوە.
پەخشان عەزیزی کە گەلاوێژی ساڵی پار لە تاران دەستبەسەر کرا و تا ئێستا لە زیندانی ئێڤین ڕووبەڕووی گەلێک ئازار و ئەشکەنجە بۆتەوە، بە پێی وتەی خۆی، پارێزەرەکەی، ئەندامانی بنەماڵەکەی و زۆرێک لە نزیکانی، جیا لە چالاکیی مرۆیی لە بواری تەندروستی و هاوکاری‌گەیاندن بە خەڵک، لە هەموو ئەو تۆمەتانەی خراونەتە پاڵی بەری بووە.
بڵاوبوونەوەی هەواڵی پشتراست‌کردنەوەی حوکمی لەسێدارەدانی پەخشان عەزیزی، خەڵکی کوردستان و ڕێکخراوەکانی پشتیوانی مافەکانی مرۆڤ و چالاکانی سیاسی و مەدەنیی نیگەران کردوە و لەم پێوەندییەدا هەوڵی جۆراوجۆر لە پێوەندی لەگەڵ وەڕێخستنی کەمپەینی ناڕەزایەتیی دژ بەم حوکمە و ڕاگرتنی، لە ئارا دایە.
شەپۆلی ڕەشبگیریی چالاکانی سیاسی و مەدەنی و هەروەها داسەپاندنی حوکمی ناڕەوای جۆراوجۆر بەسەر زیندانیانی سیاسی لە کوردستان و شوێن و ناوچەکانی دیکەی ئێران، لە لایەک نیشانەی لاوازی و شکستی ڕێژیم بەرانبەر بەو قەیرانە نێوخۆیی و ناوچەییانەیە کە ڕووبەڕووی بۆتەوە و، لە لایەکی دیکەش ترسی لە تەقینەوەی ڕەق و بێزاریی پەنگخواردوی گەلانی ئێرانە کە دەیان ساڵە سەرکوت دەکرێن.
ڕێژیمی کۆماری ئیسلامی پێی وایە بە گرتنی چالاکانی سیاسی و مەدەنی و داسەپاندنی حوکمی قورس و ناڕەوا بەسەریان‌دا دەتوانێ فەزای ترس و تۆقاندن بە سەر خەڵک و وڵات دا زاڵ بکات و بە خەیاڵی خۆی پێش بە بزووتنەوە ناڕەزایەتییەکان بگرێ. ئەوە لە حاڵێک دایە کە جیا لەوەی بازنەی بزووتنەوە ناڕەزایەتییەکانی گەلانی ئێران دژ بە ڕێژیم بەرینتر بوونەتەوە، خودی ڕێژیم بە هۆکاری گۆڕانکارییەکانی ناوچەکە و کێشە ئەساسییە نێوخۆییەکانی، لە دۆخێکی تەواو قەیراناوی دایە و بازنەی لایەنگرانی لە هەموو کات بەرتەسکتر بۆتەوە و لە هەڵوەرینی زیاتر دان.
حیزبی دێموکراتی کوردستانی ئێران وێڕای مەحکومکردنی داسەپاندنی حوکمی لەسێدارەدانی پەخشان عەزیزی، وریشە مرادی و هەموو ئەو زیندانییە سیاسییانەی کە بە ناڕەوا حوکمی جۆراوجۆریان بەسەردا سەپاوە، پشتیوانی لە هەر هەوڵێک بۆ هەڵوەشانەوەی ئەم حوکمە نادادپەروەرانەیە بە ئەرکی ئازادیخوازان و بەتایبەت کۆڕ و کۆمەڵەکانی داکۆکیکاری مافەکانی مرۆڤ و وڵاتانی دێموکراتیک دەزانێ.
حیزبی دێموکراتی کوردستانی ئێران
ناوەندی بەڕێوەبەری
٢٢ی بەفرانباری ١٤٠٣
١١ی ژانوییەی ٢٠٢٥
