عەزیز عەزیزی، باوکی پەخشان عەزیزی، یاریدەدەری کۆمەڵایەتیی کورد کە لەلایەن ڕێژیمی ئێرانەوە حوکمی لەسێدارەدانی بەسەردا سەپاوە، لە فایلێکی دەنگیدا باس لەوە دەکات کە کچەکەی تەنیا بۆ خزمەتی بریندارەکان چووەتە کوردستانی ڕۆژاوا و سەر بە هیچ حیزب و گرووپێکی سیاسی نییە، هەروەها دەڵێت ئەو بەڵگەنامانەی لە فایلەکەیدا هەیە ئەوە دەسەلمێنن.
ناوبراو دەڵێت: ''کچەکەی یاریدەدەرێکی کۆمەڵایەتی بووە و لە هەموو قۆناغەکانی دۆسییەکەیدا باس لەوە کراوە کە هەموو چالاکییەکانی ئاشتیخوزانە بووە و جەختی لەوە کردەوە کە دۆسییەی پەخشان تەنانەت لەگەڵ عەقڵیشدا ناگونجێت، کە چ کەسێک دەتوانێت لە ماوەیەکی کورتدا، هاوکات دەورەی ددانپزیشکی و سیاسی و سەربازی تەواو بکات.''
ئاسۆ عەزیزی، برای پەخشان، لە پەیامێکدا لە تۆڕە کۆمەڵایەتییەکان، داوای لە خەڵک کردووە، بۆ هەڵوەشاندنەوەی ئەم حوکمە بە هانای خوشکەکەیەوە بێن و وتی: "پەخشان تەنیا بەدوای دادپەروەری و مافی خەڵکدا دەگەڕا و ئەو تۆمەتانەی کە ئاراستەی خوشکەکەم کراون بێبنەما و نادادپەروەرانەن.''
ئەو زیندانییە سیاسییە کە بە تۆمەتی بەغی لە ڕێگەی ئەندامەتی لە یەکێک لە حیزبە کوردستانییەکانی دژبەری ڕێژیم، بەزیندان و دواتر بە لەسێدارەدران حوکم درابوو، حوکمەکەی ڕۆژی ١٩ی بەفرانبار لە دیوانی باڵای ڕێژیمی ئێران پشتڕاست کرایەوە.
پەخشان عەزیزی بۆ ماوەی ١٠ ساڵ وەک یاریدەدەریک لە ڕۆژاوای کوردستان هاوکاریی ئەو پەنابەرانەی دەکرد کە لە شەڕی داعش هەڵاتبوون، بەڵام نزیکەی ١٨ مانگ لەمەوبەر لە ئێران دەسبەسەر کرا و سزای لەسێدارەدانی بەسەردا سەپێندرا.
پشتڕاستکردنەوەی حوکمی لەسێدارەدانی پەخشان عەزیزی کاردانەوەی بەربڵاوی لێکەوتەوە، زۆرێک لە بنەماڵە مافخوازەکان، چالاکانی مەدەنی، کەسایەتییەکان و زیندانییانی سیاسی لە ئێران و ڕێکخراوە مافی مرۆییەکان، داوای هەڵوەشاندنەوەی ئەم حوکمەیان کردووە.
