کۆمه‌ڵێک له چالاکانی کلتووری، مامۆستاییانی ئایینی و چین و توێژه‌کانی نیوخۆی ڕۆژهه‌ڵات به ڕێکخستنی که‌مپه‌ینێک ناڕه‌زایه‌تیی خۆیان له‌هه‌مبه‌ر سزای له‌سێداره‌دانی په‌خشان عه‌زیزی ده‌ربڕی.
له دووتوێی ئه‌و که‌مپه‌ینه‌دا چه‌ندین چین و توێژی جۆراوجۆری کۆمه‌ڵگه‌ی ڕۆژهه‌ڵات خوازیاری هه‌ڵوه‌شانه‌وه‌ی حوکمی له‌سێداره‌دانی په‌خشان عه‌زیزیان کردووه و ئه‌و که‌مپه‌ینه بۆ ماوه‌ی ٢٤ ڕۆژ به‌رده‌وام ده‌بێت.
له به‌یاننامه‌ی ئه‌و که‌مپه‌ینه‌دا هاتووه: "به‌پێی به‌ڵگه‌کان به‌تایبه‌ت وته‌کانی باوکی په‌خشان عه‌زیزی، پشڕاستکردنه‌وه‌ی دامه‌زراوه ناده‌وڵه‌تییه‌کانی مانگی سووری سووریه، ڕێکخراوی توانابه‌خشی و په‌ره‌پێدانی شه‌مس، ڕاپۆرتی ڕێکخراوی لێبوردنی نێونه‌ته‌وه‌یی و پارێزه‌ره‌کانی ناوبراو به سه‌رنجدان به چالاکیی په‌خشان عه‌زیزی له ڕاستای بیری مرۆڤدۆستانه‌دا بۆ ئاواره‌کانی ده‌ستی داعش له سووریه و عێراق چالاک بووه".
له به‌یاننامه‌ی ئه‌و که‌مپه‌ینه‌دا هاتووه: "سزای له‌سێداره‌دانی په‌خشان عه‌زیزی و به‌ندکراوانی دیکه‌ی مه‌حکوومکراو به سێداره له‌گه‌ڵ یاسای دادپه‌روه‌ریدا ناته‌بایه".
له به‌شێکی دیکه‌ی ئه‌و به‌یاننامه‌دا نووسراوه: "ئێمه واژۆکه‌رانی ئه‌و که‌مپه‌ینه داوا له هه‌موو توێژ و سێنفێکی کوردستان ده‌که‌ین لێبڕاوانه له دژی سزای له‌سێداره‌دانی په‌خشان عه‌زیزی بوه‌ستنه‌وه".
