ڕۆژی دووشەممە یەکی ڕێبەندان، کاک حوسێن ئازەرەخش، ئەندامی حیزبی دێموکراتی کووردستانی ئێران و خەڵکی گوندی گەرگوولی سەرێ سەر بە شاری نەغەدە، لە تەمەنی ٨٣ ساڵیدا و بە هۆی نەخۆشییەوە کۆچی دوایی کرد.
ناوبراو کەسێکی نیشتمانپەروەر و خوشەویستی خەڵک بوو کە لە دەسپێکی شۆڕش لە ساڵی ١٣٥٧وە هەتا دوایین ساتەکانی ژیانی وەفادار بە ڕێبازی کوردایەتی بووە و ماڵەکەی مەکۆی حیزب و جێگای حەسانەوەی پێشمەرگە بووە.
کاک حوسێن ساڵی ١٣٦٥، بۆ ماوەی ٣ مانگ لە بەندیخانە لە ژێر ئازار و ئەشکەنجەدا بوو و لە پاراستنی نهێنیەکانی حیزب وشیار و وریا بوو.
ناوبراو چەند ساڵێک لە هێزی بەرگریدا ڕۆڵی گێڕاوە و چەندین جار بانگی ناوەندە ئەمنییەتییەکان کراوە و تووشی نەهامەتی و لێدانی سەخت بووەتەوە بەڵام لەسەر ئەو ڕێبازە سوور بووە.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
