ڕۆژی چوارشەممە ٣ی ڕێبەندان، خاتوو ڕابیعە محەممەدی کچی محەممەدسەدیق خەڵکی سەرپێڵی زەهاو بەهۆی نەخۆشی لە باشووری کوردستان ماڵاوایی لە ژیان کرد.
خاتوو ڕابیعە وێڕای بنەماڵەکەی لە کاتی دەستپێکردنی شەڕی ئێران و عێراق پەرتەوازەی باشووری کوردستان بوون و ماوەیەک لە عەربەت هەڵکەوتوو لە پارێزگای سلێمانی نیشتەجێ بوون و دوای نزیک سێ ساڵ مانەوە لە عەربەت لەلایەن ڕێژیمی بەعسەوە وێڕای سەدان بنەماڵەی ڕۆژهەڵات، ڕاپێچی ئۆردوگای زۆرەملێی ڕۆمادی لە پارێزگای ئەنبار کران و بۆ ماوەی ٢٣ ساڵ تا ڕووخانی ڕێژیمی بەعس ژیانێکی سەختیان تێپەڕاند، دواتر لە بەر مەترسیی گیانیان، ئەو ناوچەیان بەجێ هێشت و لە پارێزگای هەولێر لە کەمپی کاوە نیشتەجێ بوون .
خاتوو ڕابیعە لە هەموو ماوەی ژیانی ئاوارەیی وێڕای بنەماڵە و خەڵکی ناوچە پەیوەندیی گەرم وگوڕیان لەگەڵ حیزبی دێموکراتی کوردستانی ئێران دامەزراند و گشت بنەماڵە و خزمانیان بوونە ئەندامی حیزب و سەرەڕای سەختی ژیانی ئاوارەیی یار و پشتیوانی حیزب بوون.
ناوبراو لە ساڵی ١٣٨٥ی هەتاوی وەک ئەندامێکی دڵسۆز و چالاک لە تەشکیلاتی ئاشکرا ئەرکە تەشکیلاتییەکانی ڕاپەراندوە و بەشداریی لە هەموو کۆڕ و کۆبوونەوە و سێمینارەکاندا کردووە.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
