ڕۆژی چوارشەممە ٣ی ڕێبەندان، کاک محەممەدئەمین تەهامی نەسەب، ناوسراو بە کاک ئەمیر، ئەندامی حیزبی دێموکراتی کوردستانی ئێران بە هۆی نەخۆشییەوە لە تەمەنی ٨٤ ساڵیدا کۆچی دوایی کرد.
کاک محەممەدئەمین لە سەردەمی پێش شۆڕشی گەلانی ئێران، لە سەقز وێنەگریی هەبوو و تەواوی وێنە مێژووییەکانی سەقزی تۆمار کرد.
ناوبراو لە ساڵەکانی سەرەتای شۆڕشی گەلانی ئێراندا، لە گەڵ کۆمیتەی نهێنیی حیزب چالاکیی سیاسیی خۆی دەست پێ کرد.
ساڵی ٦٠ی هەتاوی کومیتەی شارستانی سەقز لە گوندی بەیاندەرە، کۆنفراسی پێنجەمی پێک هێنا و کاک محەممەدئەمین و چەند کەسی دیکە لەم کۆنفرانسە بەشدار بوون کە دواتر هەموو ئەم تێکۆشەرانە لە لایەن جەلادەکانی رێژیمەوە دەسبەسەر کران.
کاک محەممەدئەمین سەرەتا بەندکرانی هەتاهەتایی بەسەردا سەپا و دواتر ئەم سزایە بۆ ٢٠ ساڵ کەم کرایەوە لەم ماوەیەدا ئەشکەنجەی زۆر درا.
کاک ئەمیر ئەو کاتەی کەوتە زیندان هەموو وێنەکانی لە لایەن ڕێژیمەوە دەستیان بەسەردا گیرا.
ناوبراو ساڵی ٦٤ ئازاد کرا و زۆرتر لە گۆشەگیریدا شاری قەزوێنی بۆ ژیان هەڵبژارد و هەر لەوێ مایەوە.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
