ڕیپۆرتێری تایبەتی ڕێکخراوی نەتەوە یەکگرتووەکان بۆ مافەکانی مرۆڤ لە ئێران وێڕای دەربڕینی نیگەرانی لە ڕەتکردنەوەی داواکاریی پەخشان عەزیزی بۆ دووبارە دادگاییکردنەوە، داوای لە کاربەدەستانی ڕێژیمی ئیسلامیی ئێران کرد کە دەستبەجێ لەسێدارەدانی پەخشان عەزیزی ڕابگرن.
مای ساتۆ پێشتریش لە ١٨ی بەفرانباردا نیگەرانیی خۆی لە پشتڕاستکردنەوەی سزای لەسێدارەدانی پەخشان عەزیزی لەلایەن دادگای باڵای ڕێژیمەوە دەربڕی و ئەو کارەی ڕێژیمه بە ڕەنگدانەوەی ئازار و ئەزیەتی ژنان و چالاکانی کەمینەکان لە ئێران ناو بردبوو.
ساتۆ بە ڕەخنە گرتن لە ئەشکەنجەدان و ڕاگرتنی پەخشان عەزیزی لە ژوورە تاکەکەسییەکان و هەروەها بێبەشکردنی لە دادگاییکردنی دادپەروەرانە و دەستڕاگەیشتنی بە پارێزە، داوای هەڵوەشاندنەوەی سزای لەسێدارەدانی ئەم چالاکە مەدەنییە کوردەی کرد.
