کۆمەڵێک ڕێکخراوی فەرهەنگی و ئەدەبی و کەسایەتیی فەرهەنگی و نووسەر و شاعێر لە ڕۆژهەڵاتی کوردستان بە بۆنەی ٢ی ڕەشەمە ڕۆژی جیهانیی زمانی دایکی ڕاگەیەندراوێکیان بڵاو کردەوە.
کوردستانییانی ڕزگاریخواز!
نەتەوە ژێردەستەکان و کۆڕ و ناوەندە مافویستەکانی جیهان!
٢ی ڕەشەمە یەکێک لەو ڕۆژانەیە کە لە ڕۆژپێوی جیهانیدا وەکوو هێمایێک بۆ بەدیهێنانی جیهانێکی دادپەروەرانە و بنیادنراو لەسەر مافی دیاریکردنی چارەنووس و سەروەریی نەتەوەیی سەیر دەکرێت.
ئەگەرچی ٢ی ڕەشەمە پاش سەرهەڵدانی، لە ئافرێنەران جیا بوویەوە و بوو بە هێما-ئەکتێک بۆ بەربەرەکانێی گوتارەکانی جیهان، لە کوردستاندا هەر لە سەرەتای سەرهەڵدانیەوە بوو بە یەکێک لە هێمایینترین ڕۆژەکانی ساڵ و هەوێنی سەدان چالاکی و ڕێکخستن.
کوردستان وەک یەکێک لە وڵات-نەتەوە ژێردەستەکانی جیهان، هەر لە سەرەتای بزاڤی ڕزگاریخوازانەی خۆیەوە خواستی زمانیی وەکوو خواستێکی سەرەکی لە تێگەمەندکردن و ڕێکخستنی خەباتی خۆیدا هێناوەتە ئاراوە.
وڵاتانی سەردەستی کوردستان بەتایبەت دەسەڵاتی ئێرانی وێڕای ئاگامەندی لە پێگە و دەوری زمان لە بنیادنانی جیهاندا، بە مێکانیزمی جۆراوجۆری گوتاری-کردەیی و بە کەڵکوەرگرتن لە ئاپارتووسی خۆیان هەوڵیان بۆ دێڕادیکاڵیزەکردنی خواستی زمانی و دوورخستنەوەی زمان لە بوونی خۆی، بوون و فۆرمبەخشی بە جیهان، داوە.
مێکانیزمگەلێک وەکوو دوورخستنەوەی زمانی کوردی لە بنکەکانی ژیانی مۆدێڕنی کوردستان، هەوڵدان بۆ بەرتەسککردنەوەی جیهانی زمانی کوردی، ناساندنی زمانی کوردی وەکوو دیاردەیێکی ناهاوکات لەگەڵ جیهانی مۆدێڕن، بە زاراوەکردنی زمانی کوردی و بەزمان ناساندنی بەشێک لە پێکهاتەی ئەم زمانە و داماڵینی زمانی لە هەناوی سیاسیی خۆی بەشێک لەو مێکانیزمانەن کە لەلایەنی دەسەڵاتانی زاڵ بە سەر کوردستان و بەتایبەت لە لایەنی دەسەڵاتی ئێرانییەو لە سەد ساڵەی ڕابردوودا ڕەچاو کراون و بوودجە و بنکەیان بۆ تەرخان کراوە.
بزاڤی نەتەوەیی ڕزگاریخوازنەی کوردستان دەبێت وێڕای ئاگاداری لەم مێکانیزم و پلانانەی دەسەڵاتی ئێرانی، هەنگاوی کردەیی و گوتاریی پێویست بۆ بنیادنانی دەسەڵاتی زمانی کوردی لە کوردستاندا بهاوێژێت بە هاوهەنگاوی و کۆدەنگیی سەرجەم کەس، لایەن و ڕێکخراوەکانی جیهان ئەو هەنگاوانە جێبەجێ بکرێن.
واژۆکارانی ئەم ڕاگەیەندراوە وێڕای بەرزڕاگرتنی ٢ی ڕەشەممە وەکوو ڕۆژێکی هێمایین بۆ خواستی زمانیی کوردستان بانگهێشتی کەس، لایەن و ڕێکخراوە پێوەندیدار و بڕیاردەرەکانی کوردستان دەکەین بۆ کۆدەنگی و خۆڕێکخستن لەم دوو بوارەی خوارەوەدا؛
١. بەرزکردنەوەی خواستی پەروەردە بە زمانی کوردی و چەسپاندنی پەروەردەی کوردستانی وەکوو یەکێک لە کۆڵەکەکانی سەروەریی نەتەوەیی لە کوردستاندا.
٢. دیاریکردنی سیاسەتێکی زمانیی پلۆراڵ و کوردستانی بۆ دەربازکردنی زمانی کوردی لە ئاستەنگە ئەوترکردەکانی.
هیوادارین ئەم هەنگاوانە وەکوو سەرجەم خەباتی ڕزگاریخوازانەی کوردستان ببێت بە هەوێن و سەرچەشنێک بۆ نەتەوە ژێردەستەکان و ئامیانێک بێت بۆ ڕاکێشانی زیاتری ڕای ناوەندەکانی بڕیار و کۆڕ و کۆمەڵە ئازادی و ڕزگاریخوازەکانی جیهان بە مەبەستی چەسپاندنی سەروەریی نەتەوەکان.
پیرۆز بێت ٢ی ڕەشەمە ڕۆژی بەرزڕاگرتنی زمانی نەتەوەیی کوردستان.
