ڕۆژی پێنجشەممە، ٢ی ڕەشەمە ناوەندی فەرهەنگی و فێرکاریی ژیوار له شاری سەقز به بۆنەی ڕۆژی جیهانیی زمانی دایکی و ساڵیادی کۆچی دوایی شاعیر، نووسەر و وەڕگێڕی ناوداری کورد مامۆستا هەژار ڕێوەڕەسمێکی بەڕێوە برد.
ڕێوەڕەسمە بە بەخێرهێنانی میوانەکان و خوێندنەوەی پەخشانێک لەلایەن بەفراو چووپانی، پێشکەشکاری ڕێوڕەسمەکە دەستی پێ کرد.
لە بڕگەیەکی دیکەی ئەو ڕێوڕەسمەدا دوکتور شەماڵ ئیسماعیلپوور لە وتارێکدا باسی لە گرینگیی زمانی دایکی و ڕۆڵی مامۆستا هەژار لە خزمەتکردن بە زمانی دایکی و دەوڵەمەندکردنی کتێبخانەی کوردی کرد.
لەم ڕێوڕەسمەدا و لە توێی وتار و باسێکی زانستیی دیکەدا کە لەلایەن وریا نەورۆزییەوە پێشکەش کرا، ڕەخنە لە نایەکسانی و نادادپەروەری لە سیستمی پەروەردە لە ئێراندا گیرا و لە بڕگەکانی دیکەی ڕێوڕەسمەکەشدا چەند وتار و شێعر و ئاهەنگ و حەیران لە لایەن شاعیران، نووسەران و هونەرمەندانەوە پێشکەش بە ئامادەبووان کرا.
لە بڕگەی کۆتایی ڕێوڕەسمەکەشدا بڕوانامەی دەرچووانی خولێکی ڕێنووسی کوردیی ناوەندی فەرهەنگی و فێرکاریی ژیوار پێشکەش بە دەرچووانی ئەم خولە کرا و هاوکات سپاسنامەیەک لەلایەن ناوەندی ژیوارەوە پێشکەش بە دوکتور شەماڵ سەبارەت بە کار و چالاکیی بەڕێزیان لەپێناو خزمەت بە زمان و هونەر و کولتووری کوردی کرا.
