ڕۆژی یەكشەممە ڕێكەوتی ٥ی ڕەشەمەی ١٤٠٣ی هەتاوی، كاک حەسەن مەولوودی باوكی شەهید محەممەد مەولوودی لە تەمەنی ١١٨ساڵیدا و بەهۆی نەخۆشی و بەساڵاچووییەوە لە مەهاباد ماڵاوایی لە ژیان كرد.
مام حەسەن خەڵکی گوندی ''سیاقۆڵی سەرێ'' سەر بە ناوچەی مەنگوڕایەتیی مەهاباد بوو. ناوبراو كەسێكی كوردپەوەر و حیزبدۆست بوو و لە نێو خەڵکدا جێگەی ڕێز و متمانە بوو.
کوڕێکی ناوبراو بە ناوی محەممەد مەولوودی پێشمەرگەی حیزبی دێموکرات و لە هێزی پێشەوادا بوو كە لە ڕێكەوتی ١١ی پووشپەڕی ساڵی ١٣٧٢ی هەتاوی، لە شەڕ لەگەڵ هێزەکانی ڕێژیمی ئێران لە گوندی ''هەرمێ'' لە ناوچەی مەنگوڕایەتیی مەهاباد شەهید بوو و تیکەڵ بە کاروانی شەهیدانی حیزب و گەل بوو.
مام حەسەن تاكوو دوا چركەكانی ژیانی وەفادار بە ڕێگا و ڕێبازی كوڕە شەهیدەكەی بوو و هەمیشە وەكوو باوكی شەهیدێک كەسایەتیی بنەماڵەكەی و كوڕە شەهیدەكەی پاراست و تا دوایین ساتەكانی ژیانی دڵی بۆ وەدیهاتنی ئاوات و ئامانجی شەهیدانی ئەم خاکە لێی دا.
تەرمی ناوبراو لەنێو ئاپۆڕای خەڵکدا لە گۆڕستانی مەهاباد بە خاكی پیرۆزی نیشتمان ئەسپێردرا.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
