عەبدوڵڵا ئۆجەلان لە پەیامێکدا داوای لە پەکەکە کرد چەک دابنێت، کۆنگرە ببەستێت و خۆی هەڵوەشێنێتەوە
ڕۆژی پێنجشەممە ٩ی ڕەشەمەی ١٤٠٣ی هەتاوی، شاندی ئیمڕاڵی دوای کۆبوونەوە لەگەڵ عەبدوڵڵا ئۆجەلان، ڕێبەری به‌ندکراوی پەکەکە، لە کۆنفڕانسێکی ڕۆژنامەوانیدا، پەیامی ئۆجەلانیان بە هەردوو زمانی کوردی و تورکی خوێندەوە.
ئەحمەد تورک، سەرۆکی پێشووی شارەوانیی ماردین، پەیامی ئۆجەلانی بە کوردی خوێندەوە کە تێیدا هاتبوو پەکەکە کاتێک دامەزرا کە ڕێگەی دێموکراسی گیرابوو و ئێستا پێویستە زمانی ئاشتی و دێموکراسی پێش بخرێت.
لە بەشێکی دیکەی پەیامەکەدا هاتووە، پێویستە پەکەکە چەک دابنێت، خۆی هەڵوەشێنێتەوە و کۆنگرە ببەستێت.
هاوکات ئۆجەلان، لە پەیامەکەیدا بەرپرسیارێتیی چەکدانانی پەکەکە لە ئەستۆ دەگرێت و گەرەنتیی گفتوگۆی ئاشتی دەکات.
