ڕۆژی پێنجشەممە ٢٣ی ڕەشەمەی ١٤٠٣، جێژنی پێشوازی لە نەورۆز لە شاری مەڵکشای پارێزگای ئیلام بەڕێوە چوو.
زیاتر لە ٢٠ هەزار کەس لە سەرتاسەری پارێزگای ئیلامەوە بەشدارییان لەم ڕێوڕەسمەدا کردبوو و بەپێی زانیارییەکان ئینتیرنێتی شوێنەکە پچرابوو.
ڕێوڕەسمەکە بە سروودی نەورۆزی کوردەواری بە هاوڕێیەتی ژنان و پیاوان کە بەشێوەیەکی ڕێکوپێک و جوان خوێندرایەوە دەستی پێ کرد.
لە نیوەی جێژنەکەدا ١٢ کچی لاو، ئاگری نەورۆزیان هەڵ کرد و لاوان بە تەقەی هەوایی شادی و خۆشی خۆیان دەربڕی.
ژنان و پیاوان بە هەڵپەڕکێی کوردەواری ڕێوڕەسمەکەیان ڕازاندەوە و ڕێوڕەسمەکە بە خۆشی بەڕێوە چوو.
بۆ پاراستنی ڕێوڕەسمەکە، ٣٠٠ لاوی مەڵکشای وەکوو چاوەدێر، ڕێوڕەسمەکەیان کۆنتڕۆڵ دەکرد.
