له سه‌رجه‌م شاره‌کانی ڕۆژهه‌ڵاتی کوردستان نهورۆزی خاکیپۆشان به‌رده‌وامه و زۆربه‌ی نزیک به ته‌واوی خه‌ڵکی کوردستان به جلوبه‌رگی خاکی، هه‌وری و جامانه‌وه به پێشوازیی نهورۆزی خاکیپۆشانه‌وه چوون.
له شاره‌کانی ورمێ، مه‌ریوان، پیرانشار، شنۆ، سه‌رده‌شت، نه‌غه‌ده، سه‌قز، سه‌رپێڵی زه‌هاو، بۆکان، ئیلام، مه‌هاباد و دیوانده‌ره نهورۆزی خاکیپۆشان به گڕ و تینێکی زۆره له‌لایه‌ن نیشتمانپه‌روه‌ران و خه‌ڵکی تینوونی ئازادییه‌وه به‌ڕێوه چوو.
له ڕۆژانی ڕابردوودا له شاری ورمێی مه‌ڵبه‌ندی عه‌گیدان و مێرخاسان، به به‌شداریی زیاتر له ١٥٠ هه‌زار کچ و کوڕی سه‌وداسه‌ری ئازادی، نهورۆزی خاکیپۆشان به‌ڕێوه چوو و لاپه‌ڕه‌یه‌کی زێڕێنی دیکه‌یان له دیرۆکی ئه‌و ده‌ڤه‌ره‌دا تۆمار کرد.
له‌و ڕێوڕه‌سمه به‌شکۆیه‌دا ستران و سروودی نه‌ته‌وه‌یی و حەماسی بڵاو بوویه‌وه .
هه‌روه‌ها له سه‌یرانگه‌ی مه‌نجه‌ڵی ئیلامی دێرین و سه‌ربه‌رز، ڕێوڕه‌سمی نهورۆزی خاکیپۆشان له‌نێو جۆش و خرۆشی کچانی هه‌وری له‌به‌ر و جامانه له‌مل و کۆڕانی ئازای خاکیپۆش به‌ڕێوه چوو، شایی و هه‌ڵپه‌ڕکێی لاوان، ژنان و پیاوان حەماسه‌تێکی دیکه‌ی به‌و ڕێوڕه‌سمه دا.
له درێژه‌ی ئه‌و ڕێوڕه‌سه‌مانه‌دا له ئاوایی قه‌ڵاواری سه‌رپێڵی زه‌هاوی کرماشانی هه‌رده‌م خۆڕاگره‌وه له چه‌ند ڕۆژی ڕابردوودا ئاگری نهورۆزی ٢٧٢٥ی کوردی به ده‌ستی کوڕان و کچانی ئه‌و ده‌ڤه‌ره دڵڕفێنه‌وه کرایه‌وه و بانگی ئازادی و سه‌ربه‌ستییان به گوێی سروشت و نیشتماندا دا.
هه‌روه‌ها له شاری سه‌قزی شه‌هید ژینا و مه‌کۆی دێموکراته‌وه له ئاواییه‌کانی قه‌ڵاکۆن و چاخلوو، هاوشێوه‌ی شارۆچکه‌ی ساحێو، ڕێوڕه‌سمی هه‌زاران که‌سیی نهورۆزی خاکیپۆشان به‌ڕێوه چوو که زایه‌ڵه‌ی سرووده نیشتمانی و دروشمه نه‌ته‌وه‌ییه‌کانی "داگیرکه‌ری ئێرانی، تۆ قاتڵ ژینامانی"، "ژینی ژێرده‌ستیم ناوێ، ده‌وڵه‌تی کوردیم ده‌وێ" و "قاسملوو، قاسملوو ڕێگه‌ت دریژه‌ی هه‌یه" جارێکی تر داگیرکه‌رانیان له ئاستی بوێریان زه‌بوون کرد.
هه‌روه‌ها له شاری نه‌غه‌ده‌ی شۆڕشگێڕان و ئاوایی قاڕنێی شه‌هیده‌وه نهورۆزی خاکیپۆشان به‌وپه‌ڕی شکۆ و مه‌زنییه‌وه و له‌نێو ئاپۆڕای خاکیپۆشان و هه‌وری له‌به‌رانه‌وه ئاگری نهورۆزی کوردان کرایه‌وه و نهورۆزی کورده‌وارییان کرده دهرفهتێک بۆ به‌گژداچوونه‌وه‌ی داگیرکه‌ران و مه‌شخه‌ڵی ئازادی و ڕزگارییان کرده شه‌وچرای ڕێگای ڕوونی ئازادی.
نهورۆزی خاکیپۆشان له بێورانی سه‌رده‌شتی هه‌رده‌م له سه‌نگه‌ر و سیسێری خاکیپۆش و جامانه له‌مله‌وه به‌وپه‌ڕی گڕ و تین و له‌نێو زه‌ریای نیشتماندۆستی و پێشمه‌رگه‌خۆشه‌وسیتییه‌وه به‌ڕێوه چوو، سه‌دان کوڕ و کچی تینووی ئازادی به‌شداری ئه‌و ڕێوه‌سمه نه‌ته‌وه‌ییه بوون.
هه‌ر له سه‌رده‌شته‌وه و له ئاوایی دۆڵه‌گه‌رمه‌وه ئاگری نهورۆزی خاکیپۆشان به ده‌ستی دایکی شه‌هید ئازاد ئاڵییه‌وه کرایه‌وه و خه‌ڵکی به ئه‌مه‌گی سه‌رده‌شت به‌و شێوه‌یه ڕێزیان له شه‌هیدانی ڕێگه‌ی ڕزگاریی کوردستان گرت.
له شارۆچکه‌ی کانیسووری بانه‌ی مه‌ڵبه‌ندی سه‌ربه‌رزان و خه‌باتگێڕانه‌وه نهورۆزی خاکیپۆشان به گه‌ڕی هه‌ڵپه‌ڕکێ و شایی دایکانی ڕووسووری ئه‌و مه‌ڵبه‌نده و کوڕان و کچانی ئازادیخوازه‌وه نهورۆزی ئه‌و ساڵه‌شیان پیرۆز کرد.
هه‌روه‌ها له گوندی سه‌ردۆشی مه‌ریوانی خاکیپۆشانه‌وه، کچانی هه‌وری له‌به‌ر و کۆڕانی خاکیپۆش، به دروشمی "بژی حیزبی دێموکرات، پێشه‌نگی ڕێگه‌ی خه‌بات" و "قاسملوو قاسملوو ڕێگه‌ت درێژه‌ی هه‌یه" نهورۆزی خاکیپۆشانیان به‌رز ڕاگرت و سه‌لماندیان له هه‌موو دهرفهتێک که‌ڵک وه‌رده‌گرن هه‌تا هاواری ڕزگاریخوازی و شوناسی نه‌ته‌وه‌یی خۆیان به گوێی داگیرکه‌ران بگه‌یه‌نن و زریکه‌ی نه‌یارانی خۆیان له‌نێو زه‌ریای خاکیپۆشیدا نوقم بکه‌ن.
هه‌روه‌ها له ڕۆژانی ڕابردوودا له کێوه‌ڕه‌ش، وشته‌په و حوسێن ئابادی بۆکانی چه‌قی خه‌بات و ئازایه‌تییه‌وه گڕی ئاگری گه‌شاوه‌ی نهورۆزی خاکیپۆشانیان به دروشمی "قاسملوو قاسملوو، ڕێگه‌ت دێژه‌ی هه‌یه ڕازانده‌وه و گۆڕه‌پانی نه‌ورۆز له‌ژێر پێی خاکیپۆشان و هه‌روری له‌به‌راندا ده‌له‌رایه‌وه.
ئه‌مجاره له ئاوایی ئه‌ندێزێی پیرانشاری لانکه‌ی شۆڕش و پێشمه‌رگه‌وه، لاوانی گه‌لخۆشه‌ویست و پێشمه‌رگه‌دۆستی ئه‌ندێزێ به به‌شداریی گه‌رم و به‌تینیانه‌وه لاپه‌ڕه‌یه‌کی زێڕینی دیکه‌یان له‌نێو کارنامه‌ی خه‌بات و نیشتمانپه‌روه‌ییاندا تۆمار کرد.
له کۆسه‌که‌رێز و گوێکته‌په‌ی مه‌هابادی قازییه‌کان و شاری خرۆشاوی دێموکراتپه‌روه‌ره‌وه، هاواری قاسملوو، قاسملوو ڕێگه‌ت درێژه‌ی هه‌یه و دێموکرات دێموکرات پێشه‌گی ڕێگه‌ی خه‌بات، بۆن و به‌رامه‌ی کۆماری کوردستانیان به نهورۆزی خاکیپۆشان دا و کوڕانی ڕێبازی پێشه‌وا و کچانی ڕووسووری مه‌ڵبه‌ندی دێموکرات به ئاگری نهورۆزی ئه‌مساڵیان گڕیان له گیانی داگیرکه‌رانی کوردستان به‌ردا.
له شاری دێموکراتپه‌روه‌ر و پێشمه‌رگه‌دۆستی ئاوایی ئاڵیاوێی شنۆی شاری شه‌هیدان و پێشمه‌رگه بە سه‌مای جامانه و هه‌وری له‌لایه‌ن خاکیپۆشانه‌وه یادی نهورۆزی کوردان به‌رز ڕاگیرا و دڵی داگیرکه‌رانیان وه‌له‌رزه خست.
هه‌تا ئێستا به ده‌یان ڕێوڕه‌سمی سه‌دان هه‌زار که‌سیی نهورۆزی خاکیپۆشانی ٢٧٢٥ی کوردی له ڕۆژهه‌ڵاتی کوردستان به شکۆیه‌کی له‌ڕاده‌به‌ده‌ره‌وه به‌ڕێوه چووه و خه‌ڵکی تینووی ئازادی و سه‌ربه‌ستیی ڕۆژهه‌ڵاتی کوردستان وه‌کوو ده‌یان جاری دیکه ڕێفراندۆمێکی "نا"ی دیکه‌یان به گوێی ڕێژیمی دیکتاتۆری تاراندا چپاند و سه‌رترۆپکی نهورۆزی ئه‌مساڵ دروشمی بژی "حیزبی دێموکرات پێشه‌نگی ڕێگه‌ی خه‌بات و قاسملوو قاسملوو، ڕێگه‌ت درێژه‌ی هه‌یه" بوو.
