لە ١٠ی خاکەلێوەی ساڵی ١٣٢٦ی هەتاویدا، پێشەوا قازی محەممەد سەرۆککۆماری کوردستان و سەدری قازی و حەمەحوسێن خانی سەیفی قازی، لە گۆڕەپانی چوارچرا بە دەستی ڕێژێمی چەپەڵی پەهلەوی لە سێدارە دران.
ئەم ڕۆژە لە ڕێکەوتی ١٠ی خاکەلێوەی ١٣٩١ی هەتاوی بە پێشنیاری کۆمەڵێ چالاکوانی سیاسی و مەدەنی و کەسایەتییەکانی کوردستان بە ڕۆژی شەهیدانی کوردستان ناودێڕ و پەسەند کرا.
١٠ی خاکەلێوە ڕۆژی شەهیدانی کوردستان، ساڵیادی هەموو ئەو ئازیزانەیە کە لەپێناو کەرامەت، ماف، دادپەروەری، ژینگە، زمان و یەکسانی و ئازادی بۆ دەستەبەرکردنی سەروەریی سیاسی لە سەنگەرە جۆراوجۆرەکانی پاراستنی خاک و نیشتمان گیانیان بەخت کردووە.
بەرەی یەکگرتووی کورد وێڕای دەستخۆشی لە جەماوەری ئازا و نیشتمانپەروەر بۆ ئەو کارناواڵە شوناسخوازانە بێ وێنەیە کە لە نەورۆزی ئەمساڵدا پێکیان هێنا، داوا لە هەڵسووڕاوانی سیاسی، مەدەنی، فەرهەنگی و بەتایبەت بەڕێوەبەرانی بۆنەکان دەکات کە لەم ڕۆژەدا بە حورمەتی شەهیدانمان هیچ بۆنەیەکی نەورۆزی و شایی تاکوو کۆتایی ڕۆژ نەگرن.
یادیان بەرزو بەڕێز و ڕێگایان پڕ ڕێبوار بێت.
بەرەی یەکگرتووی کورد
٨ی خاکەلێوەی ٢٧٢٥
