هاوکات لەگەڵ بەڕێوەچوونی بەربڵاو و بەشکۆی نەورۆزی خاکیپۆشان لە سەرتاسەری کوردستان، هاووڵاتییەکی خەڵکی ورمێ لەلایەن هێزە سەرکوتکەرەکانی ڕێژیمەوە دەسبەسەر کراوە و ١٢ منداڵی دیکەش لێپرسینەوە و هەڕەشەیان لێ کراوە.
بەپێی ڕاپۆرتی هەنگاو، سەرلەبەیانیی ڕۆژی هەینی ٨ی خاکەلێوە، محممەدعەلی ئازەری، هاووڵاتیی کوردی خەڵکی شاری ورمێ لە پێوەندی لەگەڵ بەڕێوەچوونی نەورۆز لەم شارە دەسبەسەر کراوە.
ئەم هاووڵاتییە کوردە لەلایەن هێزە سەرکوتکەرەکانی ئیتلاعاتەوە و بە توندوتیژییەوە دەسبەسەر کراوە و دواتر بۆ شوێنێکی نادیار ڕاگوێزراوە و تاکوو ئێستا سەبارەت بە دۆخی ناوبراو زانیارییەک لەبەر دەستدا نییە.
هەر لەم پێوەندییەدا، ڕۆژی پێنجشەممە ٧ی خاکەلێوە، ١٢ منداڵی خەڵکی گوندی ناناسی ورمێ بە ناوەکانی مەتین جەعفەری، پژمان جەعفەری، سینا خەلیانی، یووسف قەلەندەری، یووسف عەلیڕەزایی، میلاد عەبدیلزادە، مەتین عەبدیلزادە، ژیهاد عەلیڕەزایی، فەیسەڵ عەلیڕەزایی، مانی توارە، فەرزین خوبی و ئاکام قوربانتاج" کە تەمەنیان ژێر ١٨ ساڵ بووە لەلایەن ئیتلاعاتی پادگانی گوندی "زێوەی مەرگەوەڕ"ەوە بانگ کراون وهەڕەشەیان لێ کراوە.
ئەەم ١٢ منداڵە لە پێوەندی لەگەڵ ڕێوڕەسمی نەورۆزی خاکیپۆشان بانگ کراون و دواتر لەلایەن ئەم ناوەندە سەرکوتکەرە حکوومەتییەوە هەڕەشەیان لێ کراوە و پاش چەند کاتژمێر لێپرسینەوە بە وەرگرتنی بەڵێننامەی نووسراو ئازاد کراون.
