پەیامی هاوبەشی یەکیەتییەکانی خوێندکاران، لاوان و ژنانی دێموکرات بە بۆنە ١٠ی خاکەلێوە، ڕۆژی شەهیدان کوردستان
 

خەڵکی بەشەرەفی کوردستان!
بنەماڵەی سەربەرزی شەهیدان!
وەک دەزانن لە ١٠ی خاکەلێوەی ١٣٢٦ی هەتاوی، لە مەیدانی چوارچرای مەهاباد و لە کازێوەی ئەو ڕۆژەدا، پێشەوا قازی محەممەد و سەیفی قازی و سەدری قازی لە سێدارە دران و گیانی پیرۆزیان بە کوردستان بەخشی. ئەم ڕووداوە ناخۆشە کە وەبیرهێنەرەوە هەزاران ڕۆژی دیکەیە، لە بزووتنەوەی ڕزگاریخوازیی ڕۆژهەڵات کوردستاندا، بە ڕۆژی شەهیدان ناودێر کراوە و هەموو ساڵێک ڕێبوارانی ڕاستەقینەی سەربەستی لەگەڵ ڕێبازی شەهیدان پەیمان نوێ دەکەنەوە کە هەتا سەر درێژەدەری ڕێگا و ڕێبازیان دەبن. وەک شەهیدی ڕێبەرمان، دوکتور عەبدولڕەحمان قاسملوو فەرموویەتی: "ئێمە لە ڕۆژی شەهیدبوونی هاوسەنگەرانمان ناگرین، بەڵکوو لەگەڵ ڕێ و ڕێبازیان بەڵێن نوێ دەکەینەوە و درێژەدەری ڕێگایان دەبین". 

تێگەیشتن لەوەی کە درێژەدانی ڕێگای شەهیدان هەر دروشم نییە و وەکوو ڕاستییەک دیار و ڕوونە، لە ئێستەدا بە چاو دەیبینین و شایەتین کە بە هەزاران گەنج و لاو لە ڕاپەڕینی ژینا هەتا نەورۆزی خاکیپۆشان هاوار دەکەن: "قاسملوو قاسملوو ڕێگات درێژەی هەیە"، قاسملوویەک کە سەرقافڵەی شەهیدان و دەرێژەدەری ڕێگای پێشەوا بوو. بەڵێن نوێکردنەوە لەگەڵ ڕۆحی شەهیدان ئەوەمان پێ دەڵێت، کە وشەی شەهید پیرۆزترین وشەی ئەدەبیاتی سیاسیی کوردە کە تاکی دەروەست بە هۆی گیانبەختکردنی  لە پێناو پیرۆزییەک بەناوی نیشتمان دەبێتە جێی ڕێز و خۆشەویستی و ناوی هەتاهەتایە لە دڵی نەتەوەکەیدا بەزیندوویی و بەباشی دەمێنێتەوە. 
ئەگەرچی کورد خەبات بۆ شەهیدبوون و گیانبەختکردنی ڕۆڵەکانی خۆی ناکات، بەڵکوو لە پێناو گەیشتن بە ماف و سەروەرییەکانە کە ئامادەیە باشترین ڕۆڵەکانی خۆی پێشکەش بە بارەگای سەربەستی و ڕزگاری بکات و لەم ڕێگا پڕ لە شانازییە کە لە هەمان کاتدا ئەستەم و پڕ لە هەوراز و نشێوە، هەموو ئەگەر و مەترسییەک قەبووڵ دەکات کە لە بندەستی و زەبوونیدا نەمێنێتەوە.
لاوان، ژنان و خوێندکارانی تێکۆشەر و کوردپەروەر! 
بێزاری لە ژینی بندەستی بۆ تاکە ئازا و چاونەترسەکانی کوردستان هەتا ڕادیەکە کە بە هەست و تینەوە لەسەر ڕێبازی پیرۆزی شەهیدان بەردەوام دەبن و لە هیچ هەڕەشەیەک ناپرینگێنەوە. پرینگانەوەیەک کە لە ژیانی ئاساییدا بە لۆژیک و ژیری لە قەڵەم دەدرێت، لە ژیانی تێکەڵ بە خەباتدا بە شەرمەزاری و شوورەیی چاوی لێ دەکرێت و هەر ئەم خوێندنەوەیە وا دەکات کە کچان و کوڕانی بەئەمەگ سینگیان بکەن بە قەڵغانی نیشتمان و قازی‌ئاسا ژیانی درێژی بێ‌ناوەڕۆک بکەن بە قوربانی ژیانی کورتی پڕنێوەڕۆک. 
ئەگەر هەتا ئێستەدا لە کوردستان بنەماڵەی شەهیدان بە سەربەرزی و بە خۆشەویستی ناویان لێ دەبردرێت، بۆ ئەوە دەگەڕێتەوە کە ڕێگایەک کە ڕۆڵەکانیان پێیدا ڕۆیشتوون، ڕێگایەکی پاک و پاقژ بووە و لە توانای هەموو کەسێکدا نییە و هەموو کەسێک وەکوو ئەوان ناتوانێت کە واز لە خۆشی و ژیان هەڵگرێت و ئامادە بێت گیانی پیرۆزی پێشکەش بە خاکی پیرۆزی کوردستان بکات.
ئەگەرچی ڕۆژی شەهیدانی کوردستان لە ڕۆژژمێری خەباتی سیاسیی و ڕزگاریخوازیی ئێمەدا تەنیا ڕۆژێکە، بەڵام یاد و ناویان بەردەوام لە ژیانی کورددا دەدرەوشێتەوە و سەرمەشقی ژیانێکی سەربەستانە و دوور لە ژێردەستییە و لە ڕەوتی کار و تێکۆشانماندا هەموو چرکەیەک لەگەڵیان بەڵێن نوێ دەکەینەوە و بە گوێی ڕۆحی ئارامیان دەچرپێنین کە هەتا سەر درێژەدەری ڕێگایانین.
سەرکەوێت خەباتی ڕزگاریخوازیی کورد!بڕووخێت کۆشکی ستەم و داگیرکاری!

یەکیەتییەکانی خوێندکاران، لاوان و ژنانی دێموکرات
١٠ی خاکەلێوەی ٢٧٢٥ی کوردی