ئەمڕۆ شەممە ٩ی خاکەلێوەی ١٤٠٤، بە بەشداریی ژمارەیەک لە ئەندامانی ڕێبەریی حیزب، بنەماڵەی سەربەرزی شەهیدان، کادر و پێشمەرگە و بنەماڵەکانی دێموکرات، یادی ١٠ی خاکەلێوە، ڕۆژی شەهیدانی کوردستان لە یەکێک لە بنکەکانی حیزب بەرز ڕاگیرا.
سەرەتا لەلایەن کاک سیامەند تەربی، پێشکەشکاری ڕێوڕەسمەکەوە بەخێرهاتنی بەشداربووان کرا.
دواتر لەلایەن بەڕێزان کاک کاوە بەهرامی و کاک حەسەن قادرزادە، ئەندامانی دەستەی کارگێڕیی حیزبی دێموکراتی کوردستانی ئێران و هەروەها بەڕێزان خاتوو فاتمە قادری هاوسەری شەهید حەمدی حوسێنی و خاتوو خەدیجە پوورمەند، هاوسەری شەهید عوسمان عوسمانی، تاجەگوڵینەیەک لەسەر مەزاری شەهید سەید سەلام عەزیزی دانرا.
لە بڕگەی دواتردا لەلایەن کۆڕی هونەریی حیزبەوە، سروودی ئەی شەهیدان پێشکەشی ئامادەبووان کرا.
لە بڕگەی دواتردا، خوشکە خەدیجە مەعزووری، ئەندامی کۆمیتەی ناوەندی و بەرپرسی ناوەندی کۆمەڵایەتیی حیزبی دێموکراتی کوردستانی ئێران، پەیامی تایبەت بە ١٠ی خاکەلێوە پێشکەش کرد.
خاتوو خەدیجە لە بەشێک لەم پەیامەدا ڕایگەیاند: لەم ڕۆژەدا ڕۆژی شەهیدانی کوردستان دەست لە سەر سینگ و سەر لە پێناو ڕێز و حورمەت دەنێرین بۆ ڕۆحی ئاسوودەی گشت شەهیدان، لە بەرانبەر ڕەوانی بێگەردیان و لە بەرانبەر سەری بەرزیان سەری ڕێز دادەنوێنین و بەڵێنیان پێ دەدەین تا ئاڵای کوردستان لە سەر دوندەبەرزەکانی کوردستان نەشەکێنینەوە و بووکی ئازادی لە باوەش نەگرین لە خەبات و بەرخۆدان نەوەستین.
لە بڕگەی ئاخری ڕێوڕەسمەکەدا، بەشداربووان سەردانی پیشانگای وێنەی شەهیدانیان کرد و بۆ جارێکی دیکە پەیمانی وەفاداری بە ڕێبازی پڕ سەروەریی شەهیدانیان نوێ کردەوە.
